Aqtóbe oblysyndaǵy Oıyl ózeniniń boıyndaǵy aýyldar arasyna ýaqytsha ótkel salý úshin Qonaev garnızonyndaǵy Qarýly kúshterdiń ınjenerlik-saperlik brıgadasynyń áskerı qyzmetshileri batys óńirge temir jol kóligimen attandy, dep habarlaıdy Egemen.kz.
Pontondyq kópir parkiniń elementteri temirjol platformasyna tıeldi, onyń ishinde eki úlken tonnalyq avtomobıl-pontondyq kópir segmentteri bar kólik (KrAZ-255B), sýda júzetin transporter, KamAZ jáne KrAZ bazasynda eki súıretkish-motorly qaıyq bar. Tehnıkany maıor Naýryz Tóleýovtiń basshylyǵymen 58012 áskerı bóliminiń 11 áskerı qyzmetshisinen quralǵan top alyp júredi. Mamandar baılanys quraldarymen jáne qosymsha zattarmen jabdyqtalǵan.
Áskerı ınjenerler bul jerge kelgennen keıin turǵyndardy, tehnıkany, materıaldyq quraldardy jáne janýarlardy tasymaldaý úshin ótkel jasaıdy. Aıta keteıik, ótken jyly áskerı ınjenerler 4 parom ótkelin jabdyqtaǵan (Aqtóbe, Aqmola jáne Soltústik Qazaqstan oblystarynda). Onyń kómegimen 362 reıs jasaldy, 3 myńǵa jýyq adam evakýasııalandy, 1 380-nen astam tehnıka men 423 tonna gýmanıtarlyq kómek jóneltildi.