Sýrdologtardyń málimetine súıensek, jyl saıyn elimizde shyr etip dúnıege kelgen 1400-ge jýyq sábıdiń qulaǵy nashar estıtini, tipti keıbiri sańyraý bolyp týǵany anyqtalyp jatady. Buǵan deıin jańa týǵan sábılerdiń qulaǵy qalaı estıtini qolmen tekserilip, tirkelip kelse, bul estý kemistigi anyqtalǵan balalardyń odan arǵy taǵdyryn qadaǵalaý prosesine tikeleı áser etetin edi.
Endigi jerde Almatydaǵy eki birdeı perzenthana men qos emhana sábılerdiń estý qabiletin tereń teksere alatyn zamanaýı apparattarǵa ıe bolyp otyr.
Osylaısha, «Men estımin» jobasynyń arqasynda megapolıstegi « №5 qalalyq perzenthana», «Qalalyq perıtanaldyq ortalyq», «№10 qalalyq emhana» men «№ 36 qalalyq emhana» alyp otyrǵan jańa jabdyqtar dúnıege endi kelgen sábılerdiń qulaǵyndaǵy múkisti der kezinde anyqtap, der kezinde emdomyn bastaýǵa septesip, sańyraýlyqtan saqtap qalary sózsiz.
Jańa medısınalyq quraldar endi týǵan nárestelerdiń qulaqtaryndaǵy birden biline bermeıtin, jasyryn kemistigin anyqtap, múgedektikti azaıta túsýge múmkindik beretindikten, eki jylda Almatyda 62 myńǵa jýyq sábı tekserýden óte alady degen boljam bar.
Bir jaǵynan «Men estımin» qanatqaqty jobasy Almaty qalalyq Qoǵamdyq densaýlyq saqtaý basqarmasynyń AYALA qaıyrymdylyq qorymen, «Meıirimdilik» erikti qoǵamy» qorym jáne «SATR» ortalyǵymen jasaǵan mámileleriniń aıasynda iske asyryla bastaǵanyn aıtý kerek.
Jańa dıagnostıkalyq apparattar sıfrlyq trekkıng ortalyǵyna qosylǵan. Perzenthanalar men emhanalardyń medbıkeleri osy jabdyqpen jumys isteı alýy úshin arnaıy oqytýdan ótti. Endi test nátıjeleri avtomatty túrde biryńǵaı bazaǵa jiberiledi, onda dárigerler dınamıkany baqylap, bala týylǵannan keıingi úshinshi aıda emes, perzenthanadaǵy alǵashqy aýdıologııalyq skrınıngten keıingi on tórtinshi kúni tekserý sapasyn baqylaı alady. Mundaı tásil derekterdi joǵaltpaı, qatelikter yqtımaldyǵyn tómendete otyryp, dıagnostıkanyń dáldigin arttyrady.
«Osy jobanyń arqasynda táýekel tobyndaǵy balalar qymbat ýaqyttaryn joǵaltpaı, der kezinde emdele alady. Qulaǵy nashar estıtin balalar qala bıýdjeti esebinen tegin estý apparattaryn ala alady. Bul myńdaǵan balaǵa saýaby tıetin – memleket pen qoǵamnyń yntymaqtastyǵynyń tamasha úlgisi», deıdi Almaty qalalyq Qoǵamdyq densaýlyq saqtaý basqarmasy basshysynyń orynbasary Nazgúl Imanǵalıeva.
Sonymen tereńdetilgen skrınıng barysynda estý kemistigi anyqtalǵan jaǵdaıda, qosymsha tekserý úshin balany mamandarǵa jiberedi. Qajet bolǵan jaǵdaıda «DOM» qorynyń «Balalarǵa ómir syıla» jobasy sheńberinde estý apparattary beriletin bolady. Al estýdi protezdeý MÁMS esebinen Almaty qalasyndaǵy № 5 qalalyq klınıkalyq aýrýhanada júrgiziledi.
ALMATY