Atyraý oblysynda 100 jasqa tolǵandar kóp emes. Ǵasyrlyq belesti baǵyndyrǵan jannyń biri – Uljan Temirbolatova.
Ol 1925 jyly Inder aýdanyndaǵy Jarsýat aýylynda ómirge kelgen. Qujatyndaǵy týǵan kúni – 25 aqpan.
«Bala kezimiz qıyndyqpen ótti. Oınaı da almadyq. Aldymen asharshylyqpen tuspa-tus keldi. El ishinde isherge tamaq tabylmaǵan kezde úlkender Jaıyq ózeninen balyq aýlady. Odan keıin qýǵyn-súrgindi kórdik. Endi es jııamyz-aý dep júrgende, soǵys órti lap ete tústi. Sol kezde er-azamattyń bári maıdanǵa attanyp, áıelder men jasóspirimder aýyr eńbekke aralasty. Ásirese analarymyz kúni-túni jumys istep, bar qıyndyqty taısalmaı kóterdi», deıdi Uljan ájeı.
Jastaıynan aýyr eńbekpen shyńdalǵan ol temirjol salý isine qatysqan. Fashıster Reseı Federasııasynyń Astrahan oblysynda temirjoldy buzyp ketken. Atalǵan temirjoldy qalpyna keltirýge 10-ǵa jýyq qurbysymen Uljan Temirbolatova jiberilgen.
«Jumystyń jeńili bolmaıdy ǵoı. Temirjol salý óte qıyn eken. Ásirese buǵanamyz áli qata qoımaǵan jasóspirim shaqtaǵy topyraq tasyǵanymyz, aýyr relsterdi qolmen tósegenimiz áli esimnen ketpeıdi. Balǵanyń salmaǵy aýyr edi. Tóbemizden jaý ushaǵy ushqanda, tyǵylatyn qalqa taba almaı, jan-jaqqa qashamyz. Jaý ushaǵynyń daýysy masanyń yzyńy sekildi estiledi. О́zimiz aldyn ala qazyp qoıǵan shuńqyrǵa tyǵylýǵa májbúr bolamyz. Ishetin tamaq ta, kıetin kıim de tapshy boldy. Búgingi urpaǵymyz sondaı qıyndyqty kórmese eken», deıdi ǵasyr jasaǵan áje.
Keıin surapyl soǵystan oralǵan maıdanger Mátjan Ǵubaıdýllınmen otaý qurǵan. Olar 2 ul, 3 qyz dúnıege ákelip, tálimdi tárbıe berdi. Al 1957 jyly Qyzylqoǵa aýdanynyń ortalyǵy – Mııaly aýylyna qonys aýdarǵan. Kúıeýi burynǵy «Selhoztehnıka» mekemesinde jumys istegen. Al ózi «PMK-907» mekemesiniń sylaqshysy bolyp eńbek etti.
Ǵasyrlyq belesti baǵyndyrǵan Uljan Temirbolatova 5 perzentinen 40-tan astam nemere-jıen men shóbere kórip otyr. Byltyr oǵan «Qyzylqoǵa aýdanynyń qurmetti azamaty» ataǵy berildi.
Kelini Jazıra Esenǵazynyń aıtýynsha, 100 jastaǵy keıýana dalaǵa eshkimniń kómeginsiz shyǵady. Mal-jannyń amandyǵyn tilep otyrady.
«Ájemiz densaýlyǵy jaqsy, eshqandaı shaǵym aıtpaıdy. Nemere-shóberelerin mańdaıynan súıip, jıi erkeletedi. Kún saıyn batasyn berip, áýletimizdiń berekesin arttyryp, yntymaqqa uıystyryp otyr», deıdi J.Esenǵazy.
Júz jasaǵan júrek ıesiniń balalarynyń úlkeni 75 jasqa tolǵan. Odan keıingisiniń jasy 60-tan asqan.
«Adamnyń qansha ǵumyr súretini bir Allaǵa ǵana aıan ǵoı. Jumys aýyr bolsa da erinbedik, adal eńbek ettik. Balalarymyz aman ósip, úbirli-shúbirli bolsa eken dep tiledim. 100 jasqa tolamyn degen oıym bolǵan joq. Bul – jas kúnimdegi kórgen beınetimniń zeıneti shyǵar», deıdi U.Temirbolatova.
Ony aýyldastary «Qurylysshy áje» dep ataıdy. Al nemereleri men shóbereleri úshin odan meıirimdi jan joq. Nemeresi Talǵattyń pikirinshe, ájesi bata jattatyp, úlkenderdiń áńgimesin tyńdatady.
«Bizdiń ájemizdi qonaqqa da, toıǵa da shaqyrýshylar kóp. Sondaı qonaqtyqqa da, toıǵa da nemerelerin ertip barady. Úlkenderdiń áńgimesin tyńdaımyz. Qarııalar bizge batasyn beredi. Bata jattatyp, ónegeli áńgimesin aıtyp otyratyn ájemizdi tyńdaýdan jalyqpaımyz», deıdi T.Ǵubaıdýllın.
Atyraý oblysy