Medısınalyq kómek sapasy týraly aıtqanda, birinshi kezekte mamandardyń biliktiligine nazar aýdarǵan jón. Medısınalyq uıymdardy qural-jabdyqtarmen qamtamasyz etýge jetkilikti kóńil bólinbese, ınfraqurylym jaqsarmasa, dárigerler pasıentterge is júzinde sapaly qyzmet usyna almaıdy.
О́ńirlerdi aralap, turǵyndarmen kezdeskende medısınalyq qyzmetke qatysty suraqtaryn jaýdyryp, narazylyq bildiretinder kóp. Turǵyndar áli kúnge deıin emhanaǵa qaralý úshin aptalap kezek kútýge májbúr. Memlekettiń birinshi baılyǵy – halyq densaýlyǵy. Sondyqtan densaýlyq saqtaýǵa kelgende qarjy únemdeý salany alǵa bastyrmaıdy. Memleket basshysy Qasym-Jomart Toqaev Ulttyq quryltaıdyń tórtinshi otyrysynda medısına ınfraqurylymyn barynsha damytý jumystary jalǵasatynyn aıtty. Jyl sońyna deıin «Aýylda densaýlyq saqtaýdy jańǵyrtý» ulttyq jobasy aıasynda 188 medısına nysany salynady. Osyǵan qosa Rıdderde kópbeıindi aýrýhana, О́skemende gematologııa ortalyǵy, Aqtaýda jedel járdem stansasy, Almatyda Juqpaly aýrýlar ulttyq ǵylymı ortalyǵy, Astanada Ulttyq ǵylymı onkologııa ortalyǵynyń jańa ǵımarattary paıdalanýǵa beriledi. Keler jyly 32 aýdandyq ortalyq aýrýhanany jańǵyrtý, Qyzylorda, Mańǵystaý oblystaryndaǵy aýrýhanalardyń qurylysyn aıaqtaý mindeti tur.
Negizi, «Aýylda densaýlyq saqtaýdy jańǵyrtý» ulttyq jobasy aıasynda eki jylda turǵyndarǵa alǵashqy dárigerlik kómek kórsetetin 460 nysan paıdalanýǵa berilgen. Búginde kópbeıindi ortalyq aýdandyq aýrýhanalardy jańǵyrtý jumysy baıaý júrip jatyr. Josparǵa sáıkes bıyl 32 aýrýhana jóndeýden ótýge tıis bolsa, onyń teń jartysynyń jobalyq-smetalyq qujaty endi ǵana daıyndalypty. Atalǵan mekemelerdi medısınalyq quraldarmen jabdyqtaý máselesi taǵy bar. Sondyqtan Memleket basshysy Qasym-Jomart Toqaev bul máseleni Ulttyq quryltaıda kóterip, ınfraqurylymǵa qatysty qyrýar jumysty aıaqtaý merzimin keshiktirýge bolmaıtynyn eskertti.
Keıingi eki jylda birqatar qalada erekshe qajettiligi bar adamdarǵa arnalǵan zamanaýı ońaltý ortalyqtary boı kótergen. Prezıdent keler jyldyń sońyna deıin Aqtóbede, Atyraýda, Kókshetaýda, Shymkentte, Taldyqorǵanda osyndaı ortalyqtar ashý kerek ekenin aıtty. Buǵan qosa árbir oblys ortalyǵynda erekshe qajettiligi bar, sonyń ishinde aýtızmge shaldyqqan balalardy ońaltý, damytý ortalyqtaryn qurýdy usyndy. Qazir aýtızmge shaldyqqan balalar kóbeıip barady. Olardyń barlyǵy derlik dertine shıpa izdep Astanaǵa barady. Sondyqtan Memleket basshysynyń Úkimet pen ákimderge erekshe qajettiligi bar, aýtızmge shaldyqqan balalarǵa arnalǵan nysandar ashý máselesine dereý kirisýdi tapsyrǵany qýantady. Demeýshilerdiń, «Qazaqstan halqyna» qorynyń kómegimen osy mańyzdy jumysta belgili bir ilgerileý baıqalady. Keleshekte osyndaı ortalyqtar árbir óńirde bolsa, balalarǵa úlken qoldaý bolǵaly tur.
Qazir Ulttyq joba aıasynda aýyldyq jerlerde medısınalyq mekemeler, pýnktter kóptep salynyp jatyr. Jańa nysandar zamanaýı qural-qondyrǵylarmen jabdyqtalǵan. Densaýlyǵyn tekserýge buryn kórshi aýyldaǵy eski nysandarǵa qatynaıtyn keıbir aýyldyń turǵyndary endi jańa úlgidegi nysannyń qyzmetine júginetin boldy. Degenmen aldaǵy atqarylatyn jumystardyń aýqymy óte keń. Eń bastysy, medısınalyq mekemelerdiń sany ǵana kóbeımeı, kórsetiletin qyzmettiń sapasy da arta tússe eken deımiz.
Gúldara NURYMOVA,
Májilis depýtaty