Ulttyq naqyshtaǵy buıymdarǵa degen qyzyǵýshylyq artqan saıyn bul baǵytta jumys isteıtin kásipkerler de kóbeıip keledi. Biri quraq kórpe tigip, kıim daıyndasa, endi biri ıntererdi oıý-órnekpen sándep, keńistikti qazaqy bolmysqa beıimdep júr. Endi biri bilte sham jasap, ekologııalyq taza ónimge qazaqy óń beredi. Olar úshin munyń bári – jaı ǵana qolóner emes, turaqty tabys kózi de. Qońyr reńkti naryqqa beıimdep, dástúr men kásipti úılestire bilgen kásipkerler óz ornyn taýyp, tutynýshy talǵamyna saı jańa trend qalyptastyryp otyr.
Qazaqy naqyshtaǵy jıhaz sánge aınalýy múmkin be? Kúndelikti ómirge ıkemdelgen, zamanaýı ıntererge úılesetin ulttyq stıl qalyptastyrý she? Aıdana Erimbet osy suraqtarǵa «ıá» dep jaýap berdi.
Ol – dızaıner, kásipker, zertteýshi. Biraq eń bastysy – qazaq mádenıetine shyn ǵashyq adam. Onyń qolynan shyqqan «Otyrar» aspaly shamy, «Lashyn» art-oryndyǵy, «Jylan qaiys» ústeli, «Astau, Qorqyt» kreslosy sekildi buıymdar bir qaraǵanda óner týyndysyna uqsaıdy.
– Ulttyq stıldegi jıhazǵa suranys bar. Biraq biz ony ózimiz baıqamaımyz. Jıhaz alǵanda kóp adam birinshi bolyp IKEA-ny qaraıdy. Al nege qazaqy oıýy bar oryndyq, kıizben qaptalǵan ústel nemese kóshpeliler dástúrinen shabyt alǵan sham birinshi tańdaýǵa aınalmasqa? Men qazaqy stıldi tek etno-festıvaldarda ǵana emes, kúndelikti ómirde de kórýge bolady dep sanaımyn. Maǵan bul bıznes qana emes, ómir salty. Sýretshi bolamyn dep óstim, keıin ınterer dızaınyn tańdadym. Biraq «eýropalyq stıl, skandınavııalyq stıl» degen sózderdi tym jıi estı bastaǵanda oılandym. Qazaqtyń óziniń erekshe stıli nege ıntererde kórinis tappasqa? Sóıtip, etnodızaın baǵytynda jumys isteýge kiristim, – deıdi kásipker.
2017 jyly dızaıner qyzymyz ulttyq naqyshtaǵy ınterer buıymdaryn jasaý maqsatynda óz dızaın stýdııasyn ashty. Alǵashqyda úsh adamdyq shaǵyn sheberhana retinde bastalǵan kásip búginde elimizdegi tanymal brendke aınaldy. Dızaınerlik stýdııa ulttyq naqyshtaǵy ınterer buıymdaryn jasap qana qoımaı, olardyń álemdik naryqqa jol tartýyna da jaǵdaı jasaıdy. Stýdııa shekteýli tırajben eksklıýzıvti buıymdar shyǵarady. Bul strategııa bir jaǵynan ónimniń biregeıligin saqtasa, ekinshi jaǵynan onyń ınvestısııalyq qundylyǵyn arttyrady. Qazir ol ónimderin elimizdiń ár óńirine, tipti shetelge eksporttap jatyr. Aqtaý, Aqtóbe syndy qalalardan jıi tapsyrys túsedi. Bul aımaqtarda ulttyq stıldegi ıntererge degen suranys joǵary.
– Otandyq brendterge eń úlken syn – óndiris. Qytaıda jasap, «Made in Kazakhstan» dep jazý ońaı. Biraq men úshin bul jol emes. Biz shynaıy ulttyq ónim jasaǵymyz keledi. О́ndiristiń ár satysynda qazaqtyń qoltańbasy qalýy kerek. Naǵyz óner – ýaqyt synynan ótetin dúnıe. Biz tek sánge aınalǵan trend emes, bolashaqta da baǵasyn joǵaltpaıtyn qundylyq jasasaq deımiz. Bızneske kirispes buryn qarjylyq turaqtylyqty qamtamasyz etý mańyzdy ekenin túsindim. Bar qarajatymdy stýdııaǵa saldym, nesıeden bas tarttym. Eń bastysy – sapa men daralyq. Interer buıymdarynyń óndirisi uzaq ýaqyt alady, al aınalym qarajaty baıaý qozǵalady. Sondyqtan qarjy aǵymyn muqııat josparlap, tabystyń kóp bóligin qaıta ınvestısııalaý kerek, – deıdi Aıdana.
Kompanııa aldaǵy ýaqytta ónim assortımentin keńeıtip, jıhaz jáne úıge arnalǵan toqyma buıymdaryn shyǵarýdy josparlap otyr. Osylaısha, ulttyq mádenıetimizdi zamanaýı turǵyda qaıta jańǵyrtý arqyly elimizdiń brendtik ónimderin álemge tanytýǵa nıetti.
– Bizde eki negizgi baǵyt bar: ınterer dızaın jáne kolleksııalyq jıhaz jasaý. Keıbir jobalarda etnoelementterdi klassıkalyq ınterermen úılestirip, jańa stıl qalyptastyramyz. Mysaly, meıramhana ıntererin jasasaq, onda ulttyq oıýlardy tek sándik element emes, fýnksıonal bólshek retinde qoldanamyz. Al jıhaz jasaý baǵyty boıynsha meni collectible design qyzyqtyrady – bul kolleksııalyq jıhaz, bir jaǵynan – óner, bir jaǵynan – kúndelikti ómirde qoldanýǵa bolatyn zattar. Dızaınerlik bıznes – tek shabytpen ǵana júretin sala emes, munda qarjylyq saýat pen strategııalyq oılaý asa mańyzdy. Biz ár buıymdy jasaýǵa ketken shyǵyndy, naryqtaǵy suranysty, tutynýshynyń tólem qabiletin eskerip, baǵa saıasatyn qalyptastyrdyq, – dep túsindirdi A. Erimbet.