Prezıdent Qasym-Jomart Toqaev Qytaı Kommýnıstik partııasy Ortalyq komıteti Halyqaralyq baılanystar bóliminiń meńgerýshisi Lıý Szıanchaony qabyldady, dep jazady Egemen.kz.
Kezdesý barysynda Qasym-Jomart Toqaev qazaq-qytaı máńgi ári jan-jaqty strategııalyq seriktestigi qarqyndy damyp kele jatqanyn jáne bolashaqta da osy baǵyttan aınymaıtynyn atap ótti.
«Búginde bizdiń berik baılanystarymyz máńgi dostyq, tatý kórshilik pen strategııalyq seriktestikke negizdelgen ózara tıimdi memleketaralyq yqpaldastyqtyń úlgisi sanalady. Biz QHR-men qarym-qatynasty joǵary baǵalaımyz. Sondaı-aq Qazaqstan tarapynan jan-jaqty yntymaqtastyqty nyǵaıtý úshin barlyq qajetti shara qabyldanady. Sonymen qatar men Qytaı Kompartııasy Ortalyq komıtetiniń Bas hatshysy, Qytaı Halyq Respýblıkasynyń Tóraǵasy Sı Szınpın myrzamen dostyǵymdy óte joǵary baǵalaımyn», dedi Memleket basshysy.
Prezıdent maýsym aıynda ekinshi «Ortalyq Azııa – Qytaı» sammıtine qatysý úshin Astanaǵa keletin QHR Tóraǵasynyń sapary aıasynda strategııalyq seriktestiktiń jańa múmkindikteri aıqyndalatynyna senim bildirdi.
Memleket basshysy Qazaqstan men Qytaıdyń kópjaqty qurylymdar aıasyndaǵy kózqarastary uqsas ekenin atap ótip, Tóraǵa Sı Szınpınniń halyqaralyq quqyqtyń negizgi qaǵıdattary men BUU Jarǵysyna saı ádil álemdik tártipti qalyptastyrýdy kózdeıtin jahandyq bastamalaryn qoldaıtynyn jetkizdi.
Budan bólek, Qasym-Jomart Toqaev elimizdiń «birtutas Qytaı» saıasatyna beıil ekenin rastady.
О́z kezeginde Lıý Szıanchao Memleket basshysyna Tóraǵa Sı Szınpınniń ystyq yqylasyn jetkizdi. Onyń aıtýynsha, Qytaı Qazaqstandy strategııalyq turǵydan mańyzdy seriktes retinde qarastyrady jáne qazaq-qytaı máńgi ári jan-jaqty áriptestigin tereńdetýge erekshe mán beredi.
Kezdesý barysynda saýda-ekonomıkalyq, ınvestısııalyq jáne mádenı-gýmanıtarlyq salalardaǵy yntymaqtastyqty nyǵaıtý joldary talqylandy. Osy oraıda Qasym-Jomart Toqaev eki eldiń taýar aınalymyn ulǵaıtyp, kólik-logıstıka, energetıka jáne jasandy ıntellektini damytý salalarynda iri ınvestısııalyq jobalardy júzege asyrýǵa orasan zor múmkindik bar ekenin atap ótti.