Týrızm jáne sport mınıstrligi «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» zań jobasyn ázirledi, dep habarlaıdy Egemen.kz.
Qujatta elimizdiń sport salasynda jańa irikteý júıesin engizý qarastyrylǵan. Zań jobasyna sáıkes, basym sport túrleri olardyń álemdik reıtıngteri negizinde emes, Olımpıada, Paralımpıada, Sýrdlımpıa, Azııa jáne Para Azııa oıyndarynda ulttyq qurama komandalarynyń kórsetken nátıjeleri boıynsha irikteletin bolady.
Bul ózgeris Qazaqstannyń sporttyq quramalaryn daıyndaýdaǵy basymdyqtardy naqtylaıdy jáne halyqaralyq deńgeıdegi nátıjelerge negizdelgen júıeni qalyptastyrýǵa múmkindik beredi. Osylaısha, elimizdiń sportshylaryn halyqaralyq arenalarda básekege qabiletti etý úshin naqty jáne nátıjege baǵyttalǵan saıasat júzege asyrylmaq.
Zań jobasyn ázirleý barysynda birneshe mańyzdy máseleler men naqty statıstıkalyq derekter negizge alyndy. Qazaqstanda qazirdiń ózinde 180-nen astam sport túri damyp keledi. Alaıda jyl saıyn tek 13 jazǵy jáne 5 qysqy Olımpıadalyq sport túrinen ǵana medal jeńip alynady. 2018 jyly elimizdiń sportshylary 370 medal jeńip alsa, 2020 jyly bul kórsetkish 105 medalǵa deıin tómendegen. Bul jaǵdaı sportshylardy daıarlaý júıesindegi bastapqy kezeńder men joǵary jetistikter sportyna deıingi aralyqtaǵy jetispeýshilikterdiń nátıjesi dep baǵalanady.
Jaǵdaıdy jaqsartý úshin Týrızm jáne sport mınıstrligi halyqaralyq tájirıbeni zerttedi. О́zbekstan, Belarýs, Ulybrıtanııa, Germanııa jáne Norvegııa elderiniń tájirıbesi zań jobasynyń negizine alyndy. Zań jobasy aıasynda joǵary jetistikter sportyna jatatyn sport túrlerin naqty shekteý usynylady.
Jańa júıege sáıkes tek Olımpıada, Paralımpıada, Sýrdlımpııa, Azııa jáne Para Azııa oıyndary baǵdarlamasyna kiretin sport túrleri, sondaı-aq ulttyq sport túrleri joǵary jetistikter sport túrleri retinde qabyldanady. Olardyń ishinde medal alǵan sport túrleri basym sport túrlerine qosylyp, respýblıkalyq jáne jergilikti deńgeıde birinshi kezekte qarjylandyrylady. Bul sharalar elimizdiń sport salasyn tıimdi basqarýǵa jáne shekteýli resýrstardy maqsatty túrde paıdalanýǵa múmkindik beredi.