Kókshetaý qalasynda egde adamdarǵa arnalǵan «Belsendi uzaq ómir» ortalyǵy ashyldy.
Elimizde keń qanat jaıǵan «Belsendi uzaq ómir» ulttyq baǵdarlamasy aıasynda sharapatty sharýa júzege asyryldy. Ashylý saltanatynda oblys ákimi Marat Ahmetjanov jańa ınnovasııalyq jobanyń mańyzyna toqtalyp, jasalyp jatqan ıgi ister jaıynda baıandap berdi. Ortalyq dırektory Baqyt Smaǵul aǵa býyn úshin jaıly oryn bolatyndyǵyna senim bildirdi. Aıtsa aıtqandaı, ǵımarat tolyq jańartylǵan. Qutty qurylysshynyń qalaǵynan jańa shyqqandaı jarqyrap tur. Eń bastysy, zamanaýı jabdyqtarmen qamtamasyz etilipti. Negizgi qyzmeti emdik, dene shynyqtyrý, ıoga jáne skandınavııalyq júris, vokal, horeografııa, qolóner sheberligin damytý, shahmat, toǵyzqumalaq, asyq atý tárizdi oıyndarǵa qyzyǵýshylyqty arttyrý. Kompıýterlik bilim alýǵa tolyq múmkindik jasalǵan.
«Men oblys ortalyǵyndaǵy avtokólikterdi jóndeý stansııasynda jarty ǵasyrǵa jýyq eńbek ettim, uzaq ýaqyttan beri shahmatpen aınalysamyn», deıdi qala turǵyny Sáken Táńirqulov, – ortalyq zeınetkerlerdiń bas qosyp, shúıirkelesetin, ártúrli oıyn oınap, ózderi qyzyǵatyn sharýamen shuǵyldanatyn orynǵa aınalǵaly tur. Eń bastysy, memleket tarapynan aǵa býynǵa aıta qalarlyqtaı qamqorlyq jasalyp jatyr.
Ashylý saltanatynda Fransııadaǵy halyqaralyq kúmis ýnıversıtetter qaýymdastyǵynyń prezıdenti, professor Fransýa Vellas onlaın baılanysqa shyqty. Professor ortalyqtyń ashylýymen quttyqtap, jarqyn joba jaıynda lebizin bildirdi.
Ortalyqta arnaıy medısınalyq kabınet bar. Onda dáriger kelýshilerdiń densaýlyqtaryn qadaǵalaıdy. Apparattyq baza ázirlenip, em-domnyń qajettilikteri eksheledi.
Jańa jobany júzege asyrýǵa el qamyn jegen mesenattar da aralasypty. Bul jaqsy mysal. Shoqan Ýálıhanov atyndaǵy jáne Abaı Myrzahmetov atyndaǵy Kókshetaý ýnıversıtetteri yntymaqtastyq memorandýmyna qol qoıdy. Aıtpaqshy, jańa ǵımaratta ardagerler keńesi de ornalaspaq. Osylaısha, aǵa býyn úshin aq túıeniń qarny jarylǵan ádemi bir oqıǵa oryn aldy.