Jambyl oblysynyń ákimi Erbol Qarashókeev jer silkinisi bolǵan Merki jáne T.Rysqulov aýdandarynda bolyp, tótenshe jaǵdaılar jónindegi jedel shtabtyń otyrysyn ótkizip, búlingen nysandardy aralady, dep habarlaıdy Egemen.kz.
28 naýryzdyń túninde Jambyl oblysynyń birqatar aýdany men Taraz qalasynda jer silkinisi tirkeldi. Jer dúmpýiniń joǵary qarqyny 5 ball Merki aýdanyndaǵy Merki aýylynda tirkeldi. T.Rysqulov aýdanynyń Qulan aýylynda jer silkinisiniń kúshi 4 balldy, Taraz, Shý qalalarynda, Qordaı, Moıynqum aýdandarynda 2 balldy qurady.
Oblys ákiminiń tapsyrmasyna sáıkes jedel shtab quryldy. Oblys ákiminiń orynbasary Qanatbek Mádibek tóraǵalyq etken onyń quramyna azamattyq qorǵaý qyzmetiniń, jergilikti atqarýshy organdardyń, tıisti vedomstvolardyń ókilderi kirdi.
Zardap shekkender týraly aqparat joq. Aýdandardaǵy tirshilikti qamtamasyz etý nysandary shtattyq rejımde jumys istep tur.
Qazirgi tańda Merki aýdandyq ortalyq aýrýhanasynyń, Merki aýyldyq okrýgindegi «Baldáýren» balabaqshasynyń ǵımarattarynda jáne Taldybulaq aýylyndaǵy turǵyn úıdiń as bólmesinde qabyrǵa jarylǵany anyqtaldy.
Sonymen qatar T.Rysqulov aýdany Abaı aýylyndaǵy turǵyn úıdiń, Jańaturmys aýylyndaǵy 6 baspananyń, aýyldyq mekteptiń, Qaraqystaq aýyldyq okrýginiń Kamenka aýylyndaǵy mádenıet úıiniń qabyrǵalarynda jaryqshaqtar paıda bolǵan.
Arnaıy komıssııa óńir basshysynyń tapsyrmasy boıynsha keltirilgen shyǵyndy anyqtaý jumystaryn júrgizedi. Onyń quramyna QR Tótenshe jaǵdaılar mınıstrligi Seısmologııalyq baıqaý jáne zertteýler ulttyq ǵylymı ortalyǵynyń ókilderi kiredi.
Aýdandardaǵy nysandardy mamandar aralap, ahýaldy kózben kórdi. Merki aýdanynda aınalma joldarǵa 55 adam, 33 birlik tehnıka, T.Rysqulov aýdanynda 65 adam, 40 birlik tehnıka jumyldyryldy.
«KAJservıs» JShS oblystyq fılıalynyń qyzmetkerleri (25 adam, 19 tehnıka) Merki jáne T.Rysqulov aýdandaryndaǵy respýblıkalyq mańyzy bar avtomobıl joldarynyń (5 kólik aıyryǵy, 2 temirjol ótkeli jáne 3 kópir) jaı-kúıin tekserip jatyr. 45 eldi meken zertteldi.
Qyrǵyz Respýblıkasynyń Tótenshe jaǵdaılar mınıstrligimen ózara is-qımyl kezekshi bólim arqyly uıymdastyryldy. Shoń-Qaqpa jáne Orto-Toqaı sý qoımalary qalypty rejimde jumys istep tur.
Turǵyndarmen kezdesýler uıymdastyrylyp, túsindirý jumystary júrgizildi, halyqtyń densaýlyǵy men ómirine qaýip joq. Jedel shtab jaǵdaıdy baqylaýdy jalǵastyrýda.
Jedel den qoıý jasaqtary daıyndyqqa keltirildi, táýlik boıy kezekshilik uıymdastyryldy.
Polısııa men TJD qoǵamdyq qaýipsizdikti qamtamasyz etý boıynsha tıisti sharalar qabyldady.