Mánerlep syrǵanaýdan AQSh-tyń Boston qalasynda ótip jatqan álem chempıonatyn Sofıa Samodelkına (117,78 upaı) 14 orynmen qorytyndylady, dep habarlaıdy Egemen.kz.
Ol jeńis tuǵyryna mańaılaı almasa da, osy nátıjesiniń arqasynda Olımpııa oıyndaryna qatysýshylardyń tizimine qosyldy. 18 jastaǵy sportshy úshin osynyń ózi az tabys emes. Al úzdik shyqqan syrǵanaýshylar jaıynda aıtar bolsaq, AQSh arýy Alısa Lıý (222,97) aldyna jan salmady. Ol osydan úsh jyl buryn Monpeledegi álem chempıonatynda qola medaldi ıelengennen keıin úlken sportpen qosh aıtysqan edi. Sodan muz aıdynyna qaıta oralyp, kúni keshe ǵana tórtkúl dúnıeniń teńdessizi dep tanyldy. Kúmis pen qola medaldi Japonııanyń qos juldyzy – Beıjiń Olımpıdasynyń qola jáne komandalyq saıystaǵy kúmis júldegeri, álemniń úsh dúrkin chempıony, Azııa oıyndarynyń jeńimpazy, japonııalyq Kaorı Sakamoto (217,98) men «Tórt qurlyq týrnırinde» top jarǵan Mone Tıba (215,24) enshiledi.
Al qysqa baǵdarlamada úshinshi oryndy ıelengen Mıhaıl Shaıdorov erteń saıysqa túsedi. Esterińizge sala keteıik, jattyǵýdyń alǵashqy túrinde 94,77 upaı jıyp, jerlesimiz tek amerıkalyq Ilıa Malının (110,41 upaı) men japonııalyq Iýma Kagııamadan (107,09) qalyp qoıdy.