Ulytaý oblysynda turǵyn úı qurylysy qarqyndy júrgizilip, aımaqtyń ınfraqurylymyn damytýǵa erekshe nazar aýdarylyp jatyr. Oblys kóleminde jalpy 22 turǵyn úıdiń qurylysy júrip jatyr, onyń ishinde 5 jalǵa beriletin, 7 kredıttik jáne 10 kommersııalyq úı bar. Osy úılerdiń 16-sy bıyl (2 jalǵa alý, 6 kredıttik jáne 8 kommersııalyq) paıdalanýǵa berilmek, dep habarlaıdy Egemen.kz.
Jáıremde bıyl paıdalanýǵa beriletin bir kommersııalyq úı salynyp jatyr. Sondaı-aq, halyqtyń áleýmettik osal toptary men kópbalaly otbasylar úshin ótken jyly 80 páter berilse, bıyl Naýryz merekesi qarsańynda respýblıkalyq bıýdjet esebinen taǵy 40 páter berildi. Bul týraly Ulytaý oblysynyń ákimi Dastan Ryspekov Qarajal qalasynyń turǵyndarymen kezdesý barysynda málimdedi.
Bıyl respýblıkalyq bıýdjet esebinen Qarajal qalasynda qosymsha 10 páter satyp alý josparlanǵan. Sonymen qatar, 96 páterdi satyp alý úshin 1,4 mlrd teńgege ótinim berý múmkindigi qarastyrylyp otyr. Al 2026-2028 jyldary Qarajalda 100-den astam bir qabatty eki páterli úıler salý josparlanǵan. Bul joba halyqtyń áleýmettik osal toptarynan 200-ge jýyq otbasyn baspanamen qamtamasyz etýge múmkindik beredi.
Qarajal qalasyndaǵy Táýelsizdik kóshesi, 12-úıde turǵyndar úshin qaıta jańartý jumystary júrgizilýde. Budan bólek, jergilikti bıýdjet esebinen jalpy quny 2,8 mlrd teńgeni quraıtyn 6 ınjenerlik-kommýnıkasııalyq ınfraqurylym jobasy iske asyryla bastady. Bul joba 25 kópqabatty úıdi (719 páter) jáne 373 jeke turǵyn úıdi ınjenerlik jelilermen qamtamasyz etýge baǵyttalǵan.
Qarajaldaǵy jeke turǵyn úılerge (89 ýchaske) ınjenerlik-kommýnıkasııalyq ınfraqurylym júrgizý úshin oblystyq bıýdjetten 55 mln teńge bólindi. Jalpy turǵyn úı qurylysyna 3,8 mlrd teńge qarastyrylyp, onyń ishinde Qarajal qalasyna 200 mln teńge bólindi.
Sonymen qatar, Qarajal men Jáıremde avtomobıl kóligine arnalǵan avtoturaq qurylysy júrip jatyr. Bul jobany aıaqtaý úshin oblystyq bıýdjetten 512 mln teńge qarastyrylǵan. Jáıremdegi avtoturaq qurylysyn aıaqtaý maqsatynda Tótenshe jaǵdaılar mınıstrligine qosymsha qarajat bólýge ótinim berildi. Bul sharalar eldi mekenderdiń órt qaýipsizdigin qamtamasyz etýge septigin tıgizbek.