Abaı oblysynyń mamandandyrylǵan aýdanaralyq soty Semeıde qatarlastaryn uryp-soǵyp, el arasynda úlken rezonans týǵyzǵan jasóspirimderdiń ata-analaryna qatysty sheshim shyǵardy, dep habarlaıdy Egemen.kz.
Sot olardy ata-analyq mindetterin tıisinshe oryndamaǵany úshin kináli dep taýyp, ákimshilik jazalar qoldanǵan.
Sot sheshimimen ata-analardyń biri bes táýlikke ákimshilik qamaýǵa alynǵan. Taǵy tórt ata-ana 78 640 teńge aıyppul tóleýge mindettelgen.
«Ata-analar óz balalarynyń minez-qulqyna tıisti baqylaýdy qamtamasyz etpegen. Sot barlyq mán-jaılardy eskere otyryp, tıisti sheshim shyǵardy», delingen habarlamada.
Esterińizge sala keteıik, aqpan aıynda áleýmettik jelilerde bir top oqýshynyń basqa bir balany aıaýsyz uryp-soǵyp jatqan vıdeosy taraǵan edi. Jaýapqa tartylǵandardyń arasynda uldar men qyzdar da bolǵan.
Buǵan deıin sot jasóspirimderge qatysty talap aryzdardy qaraǵan edi.
13 jáne 16 jastaǵy eki qyz arnaıy mektepke jiberilgen. Olar buryn da zań buzǵany anyqtalǵan, mysaly, qoǵamdyq oryndarda alkogoldik ishimdikter ishken. 13 jastaǵy ul bala da arnaıy mektepke jiberilgen, sebebi ol eki aı ishinde eki ret qylmys jasaǵan.
Al úsh balanyń qalǵany jasynyń kishiligine baılanysty aýyr jazaǵa tartylmaı, ekeýiniń jasy 11-ge tolmaǵandyqtan olar ıývenaldyq polısııaǵa esepke alynǵan.
Sonymen qatar, úsh oqýshynyń ata-analarynyń ata-analyq quqyqtarynan aıyrý týraly usynys jasalǵan. Sondaı-aq, jasóspirimder oqyǵan bilim mekemeleriniń basshylaryna qatysty tártiptik sharalar qabyldanyp, bir mektep dırektory jumystan bosatyldy.
Quqyq qorǵaý organdary oqıǵa mán-jaılaryn tergep jatyr. Bılik ókilderi jasóspirimderdi tárbıeleý men olardyń minez-qulqyna baqylaýdy kúsheıtýdiń qajettiligi týraly málimdedi.
Buǵan deıin, qazaqstandyqtar zardap shekken balaǵa páter satyp alý úshin úsh kún ishinde 35 mıllıon teńge jınaǵan edi.