Atyraý qalasynyń turǵyny 90 kelige jýyq bekire men 146 gramm qaraýyldyryqty úıinde zańsyz saqtaǵan. Sot úkimimen ol 3 jylǵa bas bostandyǵynan aıyryldy.
Atyraý qalasyndaǵy №2 sotta azamat K.J.-ǵa qatysty qylmystyq is qaraldy. Oǵan QR Qylmystyq kodeksiniń 339-babynyń 2-bóliginiń 5-tarmaǵymen aıyp taǵylǵan.
«2024 jylǵy 17 tamyzda tintý júrgizý kezinde K.J.-nyń Atyraý qalasyndaǵy úıinen zańsyz saqtalǵan 90 kg jýyq bekire balyǵy jáne 146 gramm bekire ýyldyryǵy tabylyp, tárkilengen. Sottalýshynyń kinási tintý hattamasymen, sot-bıologııalyq, sot-taýartaný saraptamasynyń qorytyndylarymen dáleldendi», dep habarlady sottan.
Prokýror sottalýshyǵa 3 jyl merzimge bas bostandyǵynan aıyrý túrindegi jazany taǵaıyndaýdy usyndy. Alaıda aıyptalýshy men onyń qorǵaýshylary taǵylǵan aıyppen kelisken joq.
Sot aıyptalýshynyń asyraýynda úsh jas balasy baryn eskerdi. Bul jaza men qylmystyq jaýaptylyǵyn jeńildetetin mán-jaı retinde tanyldy.
«Sot úkimimen K.J. taǵylǵan aıyp boıynsha kináli dep tanyldy. Oǵan 3 jyl merzimge bas bostandyǵynan aıyrý túrindegi jaza taǵaıyndaldy. Jazany óteý merzimi jas balalary 14 jasqa tolǵansha 3 jyl merzimge keıinge qaldyryldy», dep málim etti sottan. Sot úkimi zańdy kúshine engen joq.