Azııanyń 4 dúrkin chempıony, 2024 jyl álem birinshiliginiń altyn júldegeri ári sol dúbirli dodanyń úzdigi atanǵan qazaqstandyq daryndy boksshy Tórehan Sabyrhan kásipqoı rıngte debıýt jasady. 5 sáýir elordadaǵy «Barys arenada» ótken «Battle of the brave» týrnırinde Tórehan «balýanǵa ońy men soly birdeı» ekenin dáleldep, chehııalyq qarsylasyna qarsy tehnıkalyq nokaýt tirkedi. Qazaqstanda alǵash ret qos birdeı belbeý sarapqa salynǵan Álimhanuly-Ngamessınge tarıhı keshinde Tórehan Sabyrhan kásibı boksta ózine tıesili tarıh paraǵyn ashty, dep jazady Egemen.kz.
Jartylaı orta salmaqtaǵy jekpe-jekte otandasymyzdyń qarsylasy chehııalyq Iırjı Haýke (4-6, 2 KO) boldy. Tórehan kezdesýdiń alǵashqy mınýttarynan- aq belsendi soqqy jasap, 6 raýndqa josparlanǵan kezdesý taǵdyryn 3-raýndta sheship tastady. Shaıqastyń bul kezeńinde otandasymyz qarsylasyn 2 ret nokdaýnǵa jiberip, sońǵysynda chehııalyq ornynan tura almaı, jeńis Tórehan Sabyrhannyń enshisine jazyldy. Osy jarqyn jeńisinen keıin Tórehan Sabyrhan bizge suhbat berip, aldaǵy josparlarymen bólisti.
- Tórehan, kezdesý aldyndaǵy taktıkańyz qandaı edi? Qarsylasyńyzdyń qaýqaryn qalaı baǵalaısyz?
- Bastapqy jospar boıynsha 4-5- raýndtarda shot ashyp, 6 raýndta núktesin qoıýdy josparlaǵanbyz. Dese de qarsylas úshinshi raýndta ishten aýyr soqqy ótkizip aldy. Negizinde Iırjı Haýke kásibı bokstaǵy jolyn bastap ketken qarsylas. Bastapqy tańdaýda osy qarsylaspen judyryqtasamyn dep sheshkenmin. Bastysy tartys nátıjesi biz qalaǵanymyzdaı boldy.
- Kásibı bokstaǵy qadamyńyzdy sátti bastadyńyz, osy jekpe-jekten keıin túbegeıli kásipqoı boksqa aýysasyz ba? Áýesqoı bokstaǵy josparlaryńyzben de bólisseńiz?
- Áýesqoı boksta eresekter arasynda men baǵyndyrmaǵan birshama beles bar. Onyń ishinde álem chempıonaty men Olımpıada shyńy da bar. Sondyqtan aldaǵy ýaqytta osy bıikterdi eńsergim keledi. О́mirin sportpen ushtastyrǵan ár adamnyń armany Olımpıada altynyn taǵyný. Men de osy jolda ter tógip, 2028 jylǵy Los-Andjeles Olımpıadasynda ánuranymyzdy áýeletkim keledi. Barshańyzǵa málim, keıingi olımpıada oıyndarynda bylǵary qolǵap sheberleri altyn enshilemedi. Osy olqylyqtyń ornyn toltyrǵym keledi. Odan keıingi baǵytymyz kásibı boksqa qaraı burylady.
- Tórehan qazir jasyńyz 19-da. Osyny esepke ala otyryp, el tarıhynda eki dúrkin Olımpıada chempıony atanýdy kózdemeısiz be?
- Bul týraly naqty sheshim qabyldamadyq. Aldaǵy ýaqytta ekjeı-tegjeı oılanamyz. Ekinshi jaǵynan qanshalyqty erte kásibı boksqa den qoısam, sonshalyqty sheberligimdi shyńdap, maqsattaryma jetemin dep oılaımyn.
- «Battle of the brave» týrnırinde aǵańyz Parıj olımpıadasynyń qatysýshysy Mahmud Sabyrhan da baq synady. Ol sharshy alańda bolǵanda qandaı emosııalyq kúıde boldyńyz? Qobaljý boldy ma?
- Aǵamnyń qarsylasy jekpe-jekke taıaý qalǵanda aýysyp ketti. Biz ony salmaq ólsheý rásiminde bir-aq bildik. Bastapqyda belgilengen qarsylasy kolýmbııalyq edi. Sol boksshymen judyryqtasqanda qobaljýymyz múmkin edi. Al vetnamdyqty 1 nemese 2-raýndta tize búktiretinin boljaı bildik.
- Áńgimeńizge raqmet!
Aıta keteıik, Mahmud Sabyrhan komandasy boljaǵandaı vetnamdyq Dang Dak Haınhty ekinshi raýntda nokaýtqa jiberdi.