Búgin Astanadaǵy Ulttyq shuǵyl medısınany úılestirý ortalyǵynyń (UShMÚO) bazasynda túrki memleketteri uıymyna (TMU) múshe elderdiń arasynda Shuǵyl medısınalyq kómek kórsetý salasyndaǵy yntymaqtastyq týraly memorandýmǵa qol qoıyldy. Is-sharaǵa TMU elderiniń densaýlyq saqtaý mınıstrleri qatysty, dep jazady Egemen.kz.
«Bizdiń sanıtarııalyq avıasııa pasıentterdi el ishinde jáne shetelde emdelý ornyna jetkizý úshin jylyna 2 myńnan astam áýe tasymalyn jasaıdy. 15 óńir tikushaqpen qamtamasyz etildi, jyl sońyna deıin taǵy eki tikushaq jetkiziledi. Sanavıasııamyzdyń kóp elderden aıyrmashylyǵy – múlde tegin jáne shalǵaı aýdandardyń turǵyndary úshin qoljetimdi, memleket esebinen bolady, árbir ushýdyń artynda azamattarymyzdyń ómirin saqtap qalý tur», dedi Densaýlyq saqtaý mınıstri Aqmaral Álnazarova qujatqa qol qoıǵannan keıin.
Qazaqstanda alǵash ret shuǵyl medısına ortalyǵy tótenshe jaǵdaılar, pandemııa, tehnogendik apattar jaǵdaıynda ózara is-qımyl jasaý jáne ýaqtyly medısınalyq kómek kórsetý úshin biryńǵaı bazalyq alańǵa aınalady.
«Biz ózbek áriptesterimizben sımýlıasııalyq ortalyqtyń bazasynda master-klastar ótkizýge kelistik, onda biz jedel járdem dárigerlerin álemdik standarttar boıynsha medısınalyq kómek kórsetý daǵdylaryna úıretemiz. Bizdiń ortalyqtyń janynan ınsýlt bolǵan jaǵdaıda naýqastarǵa shuǵyl kómek kórsetý jónindegi qyzmetti úılestiretin respýblıkalyq ınsýlt ortalyǵy jumys isteıdi. Akýsherlik, toksıkologııa jáne basqa da baǵyttar boıynsha shuǵyl ortalyqtar ashý josparda bar», dedi UShMÚO basshysy Erjan Ádilbekov.
Densaýlyq saqtaý mınıstrliginiń baspasóz qyzmetiniń málimdeýinshe, UShMÚO – medısınalyq avıasııa, jedel járdem qyzmetteri men qabyldaý bólimsheleriniń jumysyn úılestiretin ozyq kópfýnksıonaldy ortalyq. Keshende 250 oryndyq stasıonar bar, oǵan 9 klınıkalyq ortalyq kiredi: jalpy hırýrgııa (onyń ishinde septıkalyq), akýsherlik, polıtravma, terapııa, kardıotorakaldyq hırýrgııa jáne kardıologııa, ambýlatorııalyq hırýrgııamen ýrologııa, jalpy hırýrgııa, gınekologııa jáne neırohırýrgııa departamentteri, sondaı-aq LOR bólimshesi jáne 29 medısınalyq beıindi qamtıtyn oftalmologııa bólimshesi. UShMÚO zamanaýı medısınalyq jabdyqtarmen (KT 256 keskin, MRT-3 tesla, angıo, rentgen jáne ýltradybystyq apparattar) jáne 12 operasııalyq zalmen jabdyqtalǵan. Sondaı-aq, aýrýhanada KINEVO 900 robotty hırýrgııalyq beıneleý júıesi bar, ol joǵary dáldik pen beıneleý operasııalaryna múmkindik beredi.