Kóktemgi qyzyl sý júrgen ýaqytta Aqmola oblysynyń turǵyndary aýyz sýdyń sapasyna alańdaıtyny bar. Bıyl da bul másele kúrdelene túsken, dep jazady Egemen.kz.
Oblystyq sanıtarlyq-epıdemıologııalyq baqylaý departamenti basshysynyń orynbasary Sáýle Sádýaqasovanyń málimdeýine qaraǵanda, jyl basynan beri ortalyqtandyrylǵan sý kózderinen 1356 sý synamasy alynǵan. Onyń 74-i mıkrobıologııalyq, al, 178-i sanıtarlyq-hımııalyq talaptarǵa saı kelmegen.
«Eń joǵary sáıkessizdik kórsetkishteri Astrahan, Arshaly, Jarqaıyń aýdandarynda jáne Kókshetaý qalasynda tirkeldi. Bul jerlerde sanıtarlyq-hımııalyq kórsetkishter boıynsha sáıkessizdikterdiń úles salmaǵy 85,4 paıyzdy qurap otyr», deıdi ol.
Qazir sý sapasyna erekshe kóńil bólinýde. 20 naýryzdan bastap qala boıynsha 27 sý synamasy zerttelip, onyń 15-i sanıtarlyq-hımııalyq kórsetkishter boıynsha talapqa saı bolmaǵan. Krasnoıar kentinde sýdyń ıis, dám, tús jáne laılylyq kórsetkishteri boıynsha normadan asqan jaǵdaılary anyqtalǵan. Osyǵan baılanysty Kókshetaý qalasy men atalǵan kentte taza sý qoımalaryna gıperhlorlaý júrgizildi.
Barlyq tıisti vedomstvolar sý tasqyny kezeńindegi qaýip-qaterdi azaıtyp, halyq pen ınfraqurylym nysandarynyń qaýipsizdigin qamtamasyz etý úshin kúsheıtilgen rejımde jumys isteýde.