Búgin Aqmola oblysynda «Jumysshy mamandyqtar jyly» aıasynda WorldSkills óńirlik chempıonaty bastaldy, dep habarlaıdy Egemen.kz.
Chempıonatqa 11 kolledjden 300-den astam bilim alýshy qatysyp, 64 quzyret boıynsha óz kásiptik daǵdylaryn kórsetýde. Bul baıqaý WorldSkills halyqaralyq qozǵalysynyń bir bóligi bolyp tabylady, basty maqsaty jumysshy mamandyqtaryn nasıhattaý jáne kásiptik daıarlyq standarttaryn damytý.
Is-sharanyń ótýine bilim alýshylar belsene qatysyp, tanym kókjıegin keńeıtip jatyr. Shyntýaıtynda, óńirlik chempıonat qazirgi zamannyń talaptaryna sáıkes kásiptik bilim damýynyń mańyzdy kezeńi bolyp sanalady. Bıyl jańa quzyretter qosylypty. Mysaly, «Kıim dızaıny», «Zootehnııa» jáne «1S platformasynda bıznes-prosesterdi avtomattandyrý» sııaqty salalar engizildi. Sonymen qatar, «AbilympicSkills» quzyretteri boıynsha baıqaýlar da ótkiziledi, olar múmkindigi shekteýli stýdentter úshin uıymdastyrylady.
«Veterınarııa», «Zootehnııa», «Astyq jáne ony qaıta óńdeý ónimderiniń sapasyn anyqtaý», «Horeografııa» jáne «Qutqarý jumystary» quzyretteri boıynsha Astana qalasy, Túrkistan, Qaraǵandy, Qostanaı, Mańǵystaý, Soltústik Qazaqstan, Batys Qazaqstan oblystary tárizdi 7 óńirdiń ókilderi qatysýda.
Jeńimpazdardy baǵalaýda óndiristik oqytý sheberleri men iri óndiris kompanııalarynyń ókilderi, atap aıtqanda, «Kamaz sentr-servıs», «Aqaı» sán úıi, «El-Nýr Servıs» seriktestikteri men «Tynys» aksıonerlik qoǵamy jáne basqa da kompanııalar qatysýda.