Katonqaraǵaı aýdanynda áýejaı qurylysy bastalǵaly aýyr júk kólikteri О́skemen – Rahman qaınary baǵytyndaǵy kúre joldyń Kishi Naryn – О́rnek arasyndaǵy bóligin búldirip tastady. Osy ýaqytqa deıin syzat túspegen asfalt opyrylyp ketken. Bul týraly jergilikti turǵyndar aıtyp, dabyl qaǵyp jatyr, dep habarlaıdy Egemen.kz.
– Áýejaı qurylysy bastalǵanyn bilip otyrmyz. О́te durys. Biraq, muqym halyq júrip júrgen jolmen 40 tonnalyq júk kólikteriniń júrýi sanaǵa syımaıdy. Olarǵa nege ruqsat beredi? Qosymsha jol salyp, sonymen júrýleri kerek edi. Endi bálenbaı shaqyrym joldy qaıta qalpyna keltirý de ońaı emes, – deıdi aýdan turǵyny Ernat Bolat.
Iá, Shyǵys Qazaqstan oblysyndaǵy eń jaqsy joldardyń biri osy, О́skemen – Rahman qaınary baǵytyndaǵy jol edi. Týrıstik maýsym bastalǵansha qaıta qalpyna keltirilse jaqsy. ShQO Jolaýshylar kóligi jáne avtomobıl joldary basqarmasynyń basshysy Nurjan Jumadilovtyń aıtýynsha, jaǵdaı qadaǵalaýǵa alyndy.
– Turǵyndardyń narazylyǵyn bilip otyrmyz. Degenmen, Prezıdenttiń tapsyrmasy oryndalýy tıis. Áýejaı strategııalyq jaǵynan óte mańyzdy nysan. Aýyr júk kólikteri úshin qosymsha jol salý múmkin emes. Asfalttyń búlingen tustary týrıstik maýsym bastalǵansha qaıta qalpyna keltiriledi. Ony merdiger kompanııa óz moıyndaryna alyp otyr, – dedi basqarma basshysy Nurjan Saılaýbekuly.
Bul oraıda «QazAvtojol» ShQO fılıaly basshylyǵy da joldyń qaıta qalpyna keltirilýin qadaǵalaıtynyn aıtty.
– Atalǵan jol 10 tonna salmaqqa eseptelgen. Kóktem kezi topyraqtyń jumsaryp, ylǵaldyń kóbeıýine baılanysty ruqsat etilgen salmaqty on tonnadan segiz tonnaǵa deıin túsirgen edik. Alaıda, merdiger kompanııa bul erejeni buzyp otyr, – deıdi «QazAvtojol» ShQO fılıalynyń basshysy Nurbek Temirhanov.
Ol zańdylyqty qadaǵalaıtyn transport polısııasy ázirshe bul másele boıynsha pikir bildirmedi. Qalaı desek te, áýejaı qurylysyndaǵy jumystar jergilikti turǵyndar men aýdan qonaqtaryna kedergi keltirmeýi tıis.