Osydan tórt jyl buryn Altaı aýdanyna qarasty Jańa Buqtyrma kentiniń turǵyndary redaksııamyzǵa habarlasyp, jalǵyz qazaq mektebiniń oqýshylary tozyǵy jetken balabaqsha ǵımaratynda oqyp júrgenin aıtqan edi. Baryp máseleni kózben kórdik, gazet betinde qaýzadyq. Budan soń jergilikti basshylyq dereý qolǵa alyp, daıyndyq jumystaryna kirisken. Qurylys ýaqtyly aıaqtalyp, kúni keshe Jańa Buqtyrmada jańa qazaq mektebi ashyldy.
Iá, buǵan deıin qazaq mektebiniń balalary kirpishi kemirilgen, esik-terezesi jemirilgen qaýsaǵan ǵımaratta oqyp kelgen. Sanıtarlyq talaptarǵa múldem saı emes edi. Ol az deseńiz, ǵımarat 1970 jyldan beri jóndeý kórmeı kelgen. Osy másele 2021 jyly «Egemen Qazaqstan» gazetinde kóterilip, sol kezdegi bilim basqarmasynyń basshylyǵy, Altaı aýdany ákimdigi dereý qolǵa alatynyn aıtqan.
Alaıda 130 oryndyq qazaq mektebin salý 2011–2020 jyldar aralyǵyndaǵy josparda bolypty. Qurylys júrgizýge jer aktisi de alynǵan. Biraq belgisiz sebeptermen sońy suıylyp, sıyrquıymshaqtanyp ketken. Eń bastysy, ol máseleniń barlyǵy búgin sheshimin tapty. Oqýshylar kópten armandaǵan jańa mektepke kóshti. Eńseli mekteptiń ashylýyna oblys ákimi Nurymbet Saqtaǵanov ta qatysty. Jalpy aýdany 10775 sharshy metr bolatyn №1 Jańa Buqtyrma orta mektebi 200 oqýshyǵa arnalǵan.
– Memleket basshysy bilim deńgeıi búkil el boıynsha teń bolýǵa tıis ekenin aıtqan. Al bul jańa, zamanaýı mektep – urpaqty tárbıeleý men sapaly bilim jolyndaǵy úlken qadam. Osy bilim oshaǵynda elimizdiń bolashaǵyn qalyptastyratyn sanaly, bilimdi de bilikti azamattar túlep ushatynyna senimdimiz, – dedi aımaq basshysy Nurymbet Saqtaǵanov.
Onyń aıtýynsha, oqý jaǵdaıyn jaqsartý jáne oqý oryndarynyń tapshylyǵyn azaıtý maqsatynda byltyr oblysta 10 jańa mektep salynǵan. Olardyń jeteýi paıdalanýǵa berildi, ekeýi Tarbaǵataı aýdanynda offshorlyq kelisimsharttar boıynsha boı kótergen. Bıyl taǵy 13 mektep salý josparda bar.
Búgingi tańda Jańa Buqtyrmadaǵy qazaq mektebinde 114 oqýshy bilim alyp jatyr. Mektepke deıingi mekemelerde 129 bala bolsa, olardyń 33-i bıyl 1-synypqa barady. Basa aıta keterligi, mektep ustazdary men oqýshylary «Egemen Qazaqstan» gazetine erekshe rızashylyqtaryn bildirip otyr.
– «Egemen Qazaqstan» basylymyna barsha ata-ananyń, mektep ujymynyń, oqýshylardyń atynan alǵysymdy aıtamyn! Mektep máselesin eń alǵash kótergen de bas basylym edi. Jazyp qana qoımaı, máseleniń sheshilýin redaksııa únemi nazarda ustap otyrdy. Nátıjesinde, minekı, kentimizde jańa mektep boı kóterip, qýanyshymyz qoınymyzǵa syımaı jatyr, – deıdi №1 Jańa Buqtyrma orta mektebiniń ustazy Anargúl Dúrimhan.
Osydan tórt jyl buryn mekteptiń aýadaı qajettigin aıtyp, ashyq pikir bildirgen de Anargúl Dúrimhanqyzy edi. Sonymen qatar mektep dırektory da búkpesiz shyndyqty aıtyp shyryldaǵan. Atyn atamaýdy suraǵan qanshama muǵalim jańa mektep keregin aıtyp dabyl qaqty. Ata-analar men oqýshylar da jańa mektep armandary ekenin aıtyp, pikir bildirgen. Mine, judyryqtaı jumylǵan uıymshyldyq nátıjesinde №1 Jańa Buqtyrma mektebine jańa ǵımarat salyndy. Áıtpese, sozbalańǵa salynyp, sheshilmeı jatqan másele shashetekten.
Shyǵys Qazaqstan oblysy,
Altaı aýdany