Mádenıet jáne aqparat mınıstri Aıda Balaeva Astanada ótip jatqan II Ortalyq Azııa medıaforýmynda kóshpelilerdiń dúnıejúzilik oıyndarynyń medıa keńistiktegi máni men mańyzyn baıandady, dep habarlaıdy Egemen.kz.
Ortalyq Azııa memleketteri basshylarynyń Sholpan-Ata qalasynda ótken Konsýltatıvtik kezdesýinde Qasym-Jomart Toqaev birlesken jumystyń mańyzdy vektory Ortalyq Azııa halyqtarynyń baı tarıhı jáne mádenı murasyn tanymal etý ekendigin atap ótken edi. Soǵan oraı Qazaqstan men О́zbekstan birlesip shyǵarǵan «Qorqyt ata» tarıhı teleserıalyn, Qyrǵyzstanmen birlesken «Qos qanat» telekópirin, Qazaqstan men О́zbekstan arasyndaǵy mádenı-gýmanıtarlyq yntymaqtastyqty keńeıtýge baǵyttalǵan «Zakovat» zııatkerlik oıyndary el nazaryna usynyldy.
Aıda Balaeva osyndaı tájirıbeni óńirdiń ortaq tarıhı tulǵalaryna, mádenı murasyna, týrıstik múmkindikteri men qazirgi zamanǵy jetistikterine arnalǵan jańa birlesken medıajobalardy jasaý arqyly keńeıte túsý kerektigin aıtty.
«Bizdiń arnalar qazirdiń ózinde Qyrǵyzstanda, О́zbekstanda, Ázerbaıjanda jáne Tájikstanda habar taratady, olarmen biz arnalardyń parıtettik qatysý tizimin keńeıtý boıynsha jumys istep jatyrmyz. О́ńirde mádenı-gýmanıtarlyq baılanystar da josparly túrde nyǵaıyp keledi. Jyl saıyn Qazaqstanda Qyrǵyzstannyń, О́zbekstannyń, Tájikstannyń jáne Túrikmenstannyń mádenı kúnderi zor tabyspen ótkizilip júr», dedi ol.
Sondaı-aq mádenıet jáne aqparat mınıstri kóshpelilerdiń dúnıejúzilik oıyndary Ortalyq Azııa elderi úshin ortaq mádenı-tarıhı murany beıneleıtin biriktirýshi oqıǵaǵa aınalǵanyn tilge tıek etti.
«О́tken jyldyń qyrkúıek aıynda Astanada ótken 5-shi Kóshpendiler oıyndaryna álemniń 89 elinen 2 800 (eki myń segiz júz) qatysýshy jáne 700-den astam jýrnalıst keldi. Dúnıejúzilik oıyndardyń ashylý rásimi men basqa da sporttyq jarystardy Túrkııa, Reseı, Ázerbaıjan, Mońǵolııa, О́zbekstan, Túrikmenstan jáne Qyrǵyzstan elderi joǵary sapada taratyp, kópshilik kóremenge taratty. Bul is-shara sporttyq jarys aıasynan áldeqaıda asyp, búkil óńirden júzdegen myń kórermen men týrıstiń basyn qosqan kóshpeli mádenıettiń tamasha merekesine ulasty», dedi A. Balaeva.