Byltyr Prezıdent Qasym-Jomart Toqaevtyń bastamasymen Qazaqstan Úkimeti 23 sáýirdi «Ulttyq kitap kúni» dep belgiledi. «Biz, eń aldymen, jastardy kitap oqýǵa baýlýymyz kerek. Sonda jappaı kitap oqıtyn ultqa aınalamyz», degen edi ol.
Osy mereke jaqynda S.Muqanov atyndaǵy oblystyq ǵylymı-ámbebap kitaphanada «Kitap – Ulttyq qazyna» atty merekelik is-sharamen tuńǵysh ret atap ótildi. Oǵan mádenıet, tilderdi damytý jáne arhıv isi basqarmasynyń basshysy Dosbol Ábdiraıysov, eks-Májilis depýtaty, jazýshy Jarasbaı Súleımenov, Ulttyq Ulan akademııasynyń ofıserleri men kýrsanttary, oblystyń zııaly qaýym ókilderi, aýdandardyń kitaphana qyzmetkerleri, stýdentter men mektep oqýshylary qatysty.
Aldymen kórme bolyp, kitaphanadaǵy kitap qory, ınnovasııalyq jobalar jáne t.b. tanystyryldy. Mereke «Kitap-Ulttyq qazyna» atty konferensııaǵa ulasty.
Spıkerler bilim men ǵylymnyń kilti kitapta ekenin, burynǵy danalardan qalǵan: «kitap bilim bulaǵy – bilim ómir shyraǵy» degen danalyq sóz baryn, uly Abaı da: «Paıda oılama, ar oıla, Talap qyl artyq bilýge. Artyq ǵylym kitapta, Erinbeı oqyp kórýge» degen naqyldar aıtqanyn eske ala otyryp, búgingi kúngi kitap oqymaýdyń problemalaryn jáne ony eńserýdiń ádis-tásilderin ortaǵa saldy.