«Qazaqkonsert» memlekettik akademııalyq konserttik uıymynda I Respýblıkalyq «Serper» ulttyq óner baıqaýynyń jeńimpazdary anyqtaldy. Is-shara QR Mádenıet jáne aqparat mınıstrliginiń qoldaýymen ótti, dep habarlaıdy Egemen.kz.
Baıqaý ulttyq ónerdi ulyqtap, jas talanttardy anyqtap, tól ónerdi dáripteýge baǵyttalǵan. О́ner dodasyna 6 nomınasııa boıynsha elimizdiń túkpir-túkpirinen 70-ten astam úmitkerden ótinim qabyldandy.
Baıqaýdyń birinshi kezeńi onlaın formatta uıymdastyrylyp, qatysýshylardyń beınematerıaldary iriktelip, 42 qatysýshy ekinshi kezeńge joldama aldy. Úmitkerler qazylar alqasynyń aldynda óner kórsetip, óz sheberlikterin pash etti. Qazylar sheshimimen ár atalymnan júzden júırik shyqqan jastar Gala-konsert aıasynda marapattaldy.
Qazylar alqasynyń sheshimine sáıkes «Dombyra» nomınasııasynan Aısholpan Qasymova, «Qobyz» nomınasııasynan Aıgerım Ahmetjanova, «Sybyzǵy» nomınasııasynan Aslan Gýmarov, «Sherter» nomınasııasynan Ýalı Muratqazın, «Jetigen» nomınasııasynan Áıgerim Karamenova, «Prıma qobyz» nomınasııasynan Ajar Hýan bas báıge enshiledi. Al Jarqyn Shákárim atyndaǵy arnaıy dıplom Aron Jubanǵalıevke buıyrdy.