QR Ádilet mınıstri Erlan Sársembaev elimizde otbasylyq-neke qatynastarynyń daǵdarysqa ushyraǵanyn aıtty, dep habarlaıdy Egemen.kz.
Mınıstrdiń aıtýynsha, 2024 jyly elimizde 124 774 neke tirkelse, sonyń 61 080-i ajyrasýmen aıaqtalǵan. Bul — árbir ekinshi otbasynyń oırandalyp jatqanyn kórsetedi.
«Buryn halqymyzǵa tán bolǵan otbasy qundylyqtary ókinishke qaraı, búgingi kúni álsirep barady. Ajyrasýdyń artynda eń aldymen balalar zardap shegedi. Bul máselege erekshe kóńil bólinýi qajet. Sondyqtan bul sanattaǵy ister mınıstrliktiń erekshe baqylaýynda», dedi Erlan Sársembaev.
Onyń málimetinshe, qazirgi tańda 12 myńnan astam alıment tóleýden jaltaryp júrgen azamattar «qyzyl aımaqqa» engizilgen. Olarmen naqty baǵyttalǵan jumystar júrgizilip jatyr. Degenmen mınıstr qoldanystaǵy zańnamalyq tetikter (ákimshilik jáne qylmystyq jaýapkershilik) óz nátıjesin bermeı otyrǵanyn atap ótti.
«Bul máseleniń túp-tamyry – otbasylyq ınstıtýttyń álsireýi men qundylyqtardyń joǵalýy. Sondyqtan munda keshendi memlekettik saıasat qajet», dep túıindedi Ádilet mınıstri.