Almatyda ótken «Qazaqstandaǵy sıfrlyq týrızm – 2025» forýmynda týrıstik salany sıfrlandyrý jáne ınnovasııalyq damytý barysy talqylandy, dep habarlaıdy Egemen.kz.
Forýmda Týrızm jáne sport mınıstriniń orynbasary Erjan Erkinbaev:
«Úkimet otyrysynda týrızmdi sıfrlandyrý máselesine erekshe nazar aýdarylyp, bul baǵyttyń memlekettik deńgeıde basymdyqqa ıe ekenin kórsetedi. Búginde Qazaqstanda segiz tilde qoljetimdi Kazakhstan.travel týrıstik portaly, áýejaılarda QR-kod júıesi jáne eQonaq qonaqtardy tirkeý platformasy jumys isteıdi. Alaıda týrıstiń sıfrly joly áli de tolyq qalyptaspaǵan. Bul uıaly baılanys operatorlary men elektrondyq tólem júıeleri sekildi jańa derekkózderdi biriktirý qajettigin kórsetedi. Mundaı keshendi tásil týrıster men sala ókilderi úshin ashyq ári yńǵaıly sıfrly orta qurýǵa múmkindik beredi» dep atap ótti.
Qazaqstan týrıstik salany biryńǵaı sıfrlyq ekojúıege biriktirýdi kózdeıdi. Bul tásil týrıstik qyzmetterdiń birizdiligin joıyp, saıahatty josparlaýdan bastap ornalastyrý men keri baılanysqa deıingi barlyq negizgi kezeńderdi biriktirýge múmkindik beredi. mańyzdy is-sharada týrızm men meımandostyq ındýstrııasyndaǵy zamanaýı tehnologııalyq sheshimder men negizgi trendter usynylyp, týrızm salasyndaǵy jetekshi mamandar, IT-kompanııalar, sondaı-aq Qazaqstan men jaqyn shet elderdiń startaptarynyń jetekshi ókilderi, onyń ishinde Pana, inDrive, Mastercard, Sabre, Mapster komapnııalarynyń ókilderi qatysty.
«Memleket basshysy jasandy ıntellektini barlyq salalarǵa engizý kerek ekenin aıtty. Osyǵan oraı qolda bar sheshimderdi biriktirý úshin forým aıasynda mańyzdy suraqtar talqylanyp, startaptarǵa qoldaý kórsetilip otyr. Búginde sıfrly sheshimder týrızm salasynyń damýyna yqpal etip qana qoımaı, elimizge týrısterdi tartýǵa, týrıstik qyzmet túrlerin ońtaılandyrýǵa, arnaıy servıster arqyly tabıǵatta aıalaýǵa mol múmkinshilik beredi» dep atap ótti «Kazakh tourism» UK» AQ basqarma tóraǵasynyń orynbasary Danıel Serjanuly.
Týrızm ındýstrııasyndaǵy sıfrlandyrý máseleleri (TravelTech), týrızmdi damytýdaǵy memlekettik sıfrly qyzmetterdiń róli (GovTech), meımandostyq ındýstrııasyna arnalǵan sıfrly tehnologııalardy (HotelTech) IT-sheshimder arqyly jetildirý men týrızm bıznesiniń jańa múmkindikterin qarastyrǵan úsh paneldik sessııada mamandar elimizdegi týrızm salasynyń damý barysyn talqylady.
Baıqaýǵa qoldanystaǵy prototıpteri bar týrızm salasyndaǵy 10-nan astam ınnovasııalyq IT-joba joldanǵan. Olardyń qatarynda ApartX, CheckInn, IZDE, OTA sııaqty startaptar bar. Irikteý kezeńiniń nátıjesinde 10 perspektıvalyq trevel-startap avtorlary aqshalaı syılyqqa ıe bolyp, jobalaryn áleýetti ınvestorlar men seriktesterge tanystyrdy. Mobıldi gıd, Qazaqstan boıynsha týrlardy iske asyrý qosymshasy, borttyq týr satý júıesi, qonaq úılerdi basqarýdy avtomattandyrý júıesi, páter jaldaýdy avtomattandyrý platformasy, turǵyn úı izdeý agregatory jáne basqa da ınnovasııalyq jobalar týrızm salasy úshin tartymdy. Baıqaýdyń jalpy júlde qory 10 mıllıon teńgeni qurady.
Almaty