Májilistiń jalpy otyrysynda Ekologııa máseleleri jáne tabıǵat paıdalaný komıtetiniń múshesi Erbolat Satybaldın «QR keıbir zańnamalyq aktilerine orman sharýashylyǵy jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasy jóninde baıandama jasady, dep jazady Egemen.kz.
Atalǵan zań jobasyna Qazaqstan Respýblıkasy Parlamenti Senatynyń depýtattary bastamashylyq etti.
Zań jobasynyń negizgi normalary:
- Aýyldyq eldi mekenderdiń nemese áleýmettik (emdeý jáne bilim berý mekemeleri, qazirgi zırattar), ınjenerlik ınfraqurylym (káriz-tazartý qurylysjaılary, elektr berý jelileri) obektileriniń jumys isteýin qamtamasyz etý úshin erekshe qorǵalatyn tabıǵı aýmaqtardyń jerlerin aýystyrý úshin ruqsat berýge;
- Injenerlik jáne kommýnaldyq qamtamasyz etý jelileriniń kommýnıkasııalaryn salý úshin memlekettik orman qory jerlerin basqa sanattaǵy jerlerge aýystyrýǵa ruqsat berýge;
- Alakól memlekettik tabıǵı qoryǵynyń arnaıy bólingen ýchaskelerinde jergilikti halyqtyń muqtajy úshin shóp shabý múmkindigi máselesin ýákiletti organnyń belgilegen tártippen sheshýge baǵyttalǵan.
Sondaı-aq, zań jobasyn qaraý barysynda kelesi normalar qaralyp, olar boıynsha qorytyndy alý úshin Úkimetke joldandy.
- Qazaqstan Respýblıkasynyń Jer jáne Orman kodeksterine gıdroelektr stansııalaryn salý úshin jer ýchaskelerin berýge;
- Orman qory jerlerinde kómirtegi ofsetterin iske asyrýǵa, ormanda órt qaýpi bolǵan jaǵdaıda qajetti janar-jaǵarmaımen jáne orman órtterin sóndirý úshin áýe kemeleriniń avıaotyn rezervterin jasaqtaýǵa, sonymen birge orman qorǵaý qyzmetkerleriniń qoǵamdyq qorǵaý jáne materıaldyq kómek kórsetýge;
- Erekshe qorǵalatyn tabıǵı aýmaqtardyń jerlerin aýyldyq eldi mekenderdiń jumys isteýi úshin basqa sanattaǵy jerlerge aýystyrý jónindegi normalardy alyp tastaýǵa baǵyttalǵan.
Depýtattyń aıtýynsha, joǵaryda baıandalǵan normalar boıynsha Úkimet pen Parlament Májilisiniń komıtetteri osy zań jobasy boıynsha oń qorytyndylaryn berdi.
Jumys tobynyń quramyna Parlament depýtattary, Ekologııa jáne tabıǵı resýrstar, Aýyl sharýashylyǵy, О́nerkásip jáne qurylys, Sý resýrstary jáne ırrıgasııa, Tótenshe jaǵdaılar jáne Ádilet mınıstrliginiń ókilderi kirdi.
Aıta keteıik, zań jobasy boıynsha tanystyrylym ótkizildi. Jumys tobyna alpystan astam túzetýler kelip tústi, olar jumys tobynyń on bir otyrysynda jáne komıtettiń keńeıtilgen otyrysynda qaraldy.
Depýtat joǵarydaǵy aıtylǵandardy eskere otyryp, Zań jobasyn birinshi oqylymda maquldaý múmkin dep sanaıtynyn aıtty.