Memleket basshysy Qasym-Jomart Toqaev A.N.Syzǵanov atyndaǵy Ulttyq ǵylymı hırýrgııa ortalyǵyna quttyqtaý joldady. Bul týraly Aqordanyń baspasóz qyzmeti habarlady, dep jazady Egemen.kz.
Jýyrda A.N. Syzǵanov atyndaǵy Ulttyq ǵylymı hırýrgııa ortalyǵy elimizdiń medısına tarıhynda tuńǵysh ret bir mezette úsh naýqasqa úsh donordyń búıregin toǵyspaly transplantasııa tásilimen salatyn asa kúrdeli operasııany sátti ótkizdi.Prezıdent belgili hırýrg, professor Bolatbek Baımahanovtyń jetekshiligimen jasalǵan bul operasııany otandyq medısınanyń zor jetistigi retinde baǵalap, ortalyq ujymyna Alǵys hat joldady.
«Memleket densaýlyq saqtaý salasyn damytýǵa basa mán beredi. Bul rette kóptegen irgeli bastama qolǵa alynyp, aýqymdy jumys atqarylyp jatyr. Sonyń nátıjesinde ulttyq medısına qarqyndy damyp keledi. Sizder jasaǵan biregeı operasııa – sonyń aıqyn dáleli. Qazir elimiz óte kúrdeli transplantasııalyq operasııa jasaıtyn álemdegi alty memlekettiń qataryna kiredi. Bul jetistikke otandyq mamandardyń, sonyń ishinde ózderińizdiń qajyrly eńbekterińiz ben erekshe bilimderińizdiń, sondaı-aq teńdessiz tájirıbelerińizdiń arqasynda jetip otyrmyz. Barshańyzǵa shynaıy rızashylyǵymdy bildiremin. Bolashaqta da ult saýlyǵyn jaqsartý úshin tynymsyz ter tógip, halqymyzǵa qaltqysyz qyzmet ete beresizder dep senemin», delingen Alǵys hatta.