Qazaq-túrik telehıkaıasy

Qazaqstan men Túrkııa memleketteri  arasynda ortaq telehıkaıa túsirý týraly kelisimge qol jetkizildi. Túrik jaǵy oǵan qoldaý bil­dirip, jan-jaqty kómek kór­setýge ázir eken­dikterin málim­dedi. Ol týraly jaqynda Qa­­zaq­stan Respýblıkasynyń Túr­­ik Res­­pýblıkasyndaǵy Tóten­she jáne óki­letti elshisi Jan­seıit Túımebaevtyń Túrkııa­nyń memlekettik TRT tele­­ra­dıokorporasııasynyń bas­shylyǵymen bolǵan kezdesýi barysynda belgili boldy. Sonymen qatar, munan bylaıǵy ýaqytta qazaqstandyq teleónimder Túr­kııada kórsetiletin bolyp sheshildi. Onyń ishinde, otandyq tanymal «Syrǵalym», «Áke serti», «Uljan» jáne «Aǵaıyndylar» týyndylaryn túrik tiline dýblıaj jasaýǵa osy eldegi Qazaqstan elshiligi kómek kórsetkeli otyr. «Elder men qurlyqtardy baılanys­tyrýshy úlken qural – televızııa bolyp sanalady. Túrkııanyń eń iri memlekettik telearnasy TRT, onyń ishinde 8 memleketke habar taratatyn, Ázerbaıjan, Qyrǵyz, О́zbekstan, Qazaqstan sekildi baýyrlas el­derdiń ulttyq ónerin, dástúrin, derekti fılmderi men mýzykalyq baǵdarlamalaryn kórermenge túrik tilinde usynatyn TRT-AVAZ (Áýez) telearnasymen bizdiń baılanysymyz óte tyǵyz. Sońǵy jyldary Qazaqstanda túsirilgen fılmderdi, telehıkaıa­lardy jáne balalarǵa arnalǵan teleónimderdi Túrkııa kórermenderine usyný máse­lesi oń sheshimin taýyp kele­di», – dedi J.Túımebaev. Osyǵan deıin de Túrkııanyń basty telearnalarynda «Balalyq shaǵymnyń aspany», «Jaýjúrek myń bala» sııaqty týyndylar kórsetilip, túrik kórermenderiniń kóńilinen shyqqany belgili. Qazirgi tańda Túrkııanyń áıgili TRT-AVAZ qazaqtyń ulttyq sport túrlerin, onyń ishinde, ási­rese, kókpardy túrkitildes baýyr­larymyzdyń arasynda keńinen nasıhattaýdy qolǵa alǵan. Esterińizge sala keteıik, 2009 jyly alǵash ret habar tarata bas­taǵan TRT-AVAZ telearnasy 2012 jyldan beri qazaq tilinde de habar tarata bastady. Ol úshin arnaıy qazaq redaksııasy quryldy. Ol kún saıyn kórsetiletin jańalyqtar toptamasyn ázirleıdi, oǵan «Qa­zaq­stan» ulttyq arnasynyń basshylyǵy da atsalysýda. Raýan ESQALI.