Densaýlyq saqtaý mınıstrligi jedel medısınalyq qyzmetti uzaq kútýge qatysty shaǵymdardyń kóbeıgenin eskerip, onyń jumysyn júıeleý úshin ózgerister engizdi. 1 mamyrdan kúshine engen jumys tártibine saı emhanalardyń janyndaǵy mobıldik brıgadalar 8:00-den 20:00-ge deıin jumys isteıdi. Al 4-sanattaǵy shaqyrtýǵa mamandar 60 mınýt ishinde jetýi tıis. Jedeldiktiń 4-sanatyndaǵy shaqyrtý degenimiz ne? Bul sanatqa qandaı naýqastar jatady? Salalyq mınıstrlik redaksııa joldaǵan saýaldarǵa resmı jaýap berdi, dep jazady Egemen.kz.
«Jedel járdem» shaqyrtýlarynyń 50%-dan astamy 4-sanatqa tıesili
Mınıstrlik meńzegen ómirge qaýip tóndirmeıtin jedeldiktiń 4-sanatyna joǵary qysym, temperatýra, jeńil jaraqattar jatqyzylǵan.
Mundaı shaqyrtýlar tıisinshe, jedel kómekke muqtaj, ómirine qaýip tóndiretin jaǵdaılary bar pasıentterge der kezinde jetýge kedergi keltirgen.
Statıstıkaǵa saı, osy jyldyń birinshi toqsanynda Qazaqstanda «jedel járdem» qyzmeti 2, 1 mln-nan astam shaqyrtýǵa qyzmet kórsetken. Eń kóp ótinishter joǵaryda atalǵandaı jedeldiliktiń 4-sanaty boıynsha tirkelgen: 763 463 shaqyrtý, onyń 518 myńnan astamyna MSAK mobıldik brıgadalary barǵan. 1-sanat boıynsha shaqyrtýlardyń sany 104 443, 2-sanat boıynsha — 642 312, 3-sanat boıynsha — 574 580 shaqyrtýdy quraǵan.
«Endi medısınalyq-sanıtarııalyq alǵashqy kómektiń mobıldik brıgadalary (MSAK) shaqyrtýlarǵa shyǵyp, pasıentterdiń úıine josparly túrde barady. Bul azamattardyń densaýlyq jaǵdaıyn ýaqtyly baqylaýdy qamtamasyz etýge, ásirese sozylmaly aýrýlary bar pasıentterdiń jaǵdaıynyń nasharlaýyna jedel den qoıýǵa múmkindik beredi.
MSAK mobıldik brıgadalary 25 myń turǵynǵa bir brıgada esebinen qurylady. Olar pasıenttiń turǵylyqty jeri nemese bekitilýine qaramastan naqty kelgen jeri boıynsha jumys isteıdi.
Qajet bolǵan jaǵdaıda mobıldik brıgadalarmen arnaıy baǵyttaǵy mamandar da birge bolady, atap aıtqanda balalarǵa kómek pedıatrdyń qatysýymen, eresekterge — pasıent jaǵdaıynyń sıpaty men aýyrlyǵyna baılanysty arnaıy mamandardy (kardıologtar, nevropatologtar jáne basqa dárigerler) tarta otyryp kórsetiletin bolady. Bul tásil arqyly joǵary sapaly ataýly medısınalyq kómek kórsetiledi», dep túsindirdi Densaýlyq saqtaý mınıstrliginiń baspasóz qyzmeti.
Jańa júıe boıynsha jedel járdem qyzmetiniń jumys tártibi qandaı?
MSAK mobıldik brıgadasynyń shaqyrtýǵa kelý ýaqyty - 60 mınýtqa deıin bolyp bekitilgen.
Barynsha shuǵyl sanattar: 1-sanatqa - 10 mınýt, 2-sanatqa - 15 mınýt, 3-sanatqa - 30 mınýtta jedel járdem jetýi tıis.
Al «jedel járdemdi» shaqyrtý burynǵydaı «103» nomeri arqyly júzege asyrylady.
Dıspetcher arnaıy algorıtmdi paıdalana otyryp, olardy shuǵyldyq deńgeıine qaraı birinshiden tórtinshi sanatqa deıin jikteıdi. Bul júıe birneshe jyldan beri qoldanysta ekeni belgili.
Negizgi ózgeris retinde shuǵyl medısınalyq kómekti qajet etpeıtin barlyq ótinishter naqty belgilengen ýaqytta alǵashqy medısınalyq-sanıtarııalyq kómek uıymdaryna (emhanalarǵa) joldanatynynda. Jumys kúnderi saǵat 08:00-den 19:00-ge deıin jáne senbi kúnderi saǵat 08:00-den 12:00-ge deıin. Qalǵan ýaqytta shaqyrtýlarǵa «103» qyzmetiniń brıgadalary burynǵy tártippen qyzmet kórsetedi.
Barlyq qalalyq emhana 1 mamyrǵa deıin óz mobıldi brıgadalaryn qurý baǵytynda jumys istegen. Atalǵan mobıldi brıgadalar «jedel járdem» qyzmeti nemese ýchaskelik qyzmetpen teńestirilmeıdi. Ýchaskelik dárigerler pasıentterdi qabyldaǵannan keıin úıge barady, mobıldi brıgada – bólek qyzmet. Onyń quramyna dáriger (nemese feldsher) jáne arnaıy jabdyqtalǵan avtokóligi bar júrgizýshi kiredi.
Qazirgi ýaqytta Qazaqstanda mindetti áleýmettik medısınalyq saqtandyrý qory arqyly alǵashqy medısınalyq-sanıtarııalyq kómek (AMSK) kórsetetin 691 klınıka bar.
Astanada AMSK júıesimen shamamen 40 medısınalyq uıym jumys isteıdi. Olardyń ishinde negizinen iri klınıkalardan turatyn 10 shaqty uıym birneshe jyldan beri tórtinshi sanattaǵy shaqyrtýlardy óz betinshe qamtamasyz etip kelgen. Endi olar shaǵyn seriktesteriniń shaqyrtýlaryn da qabyldaı alady, ıaǵnı, emhanalar arasynda ózara aýtsorsıngtik kelisimsharttar jasaý quqyǵy saqtalǵan.
Osylaısha, salalyq mınıstrlik «jedel járdem» qyzmetin júıeleýdi kózdegen.