Aqmola oblysynda «Aýyl – El besigi» jobasy aıasynda aýyldyq aýmaqtardy damytý baǵytyndaǵy aýqymdy jumystar jalǵasyp jatyr, dep habarlaıdy Egemen.kz aqparat agenttigi.
2019 jyly Memlekettik óńirlerdi damytý baǵdarlamasynyń bir bóligi retinde bastalǵan bul bastama búginde jańa formatta – 2027 jylǵa deıingi aýyldyq aýmaqtardy damytý tujyrymdamasy retinde júzege asyrylýda.
Jobanyń negizgi maqsaty – bolashaǵy bar aýyldardy basym baǵyt retinde damytyp, ınfraqurylymdy jańǵyrtý jáne aýyldaǵy ómir súrý deńgeıin óńirlik standarttarǵa saı etý. Alty jyl ishinde oblysta jalpy quny 59,6 mıllıard teńgeni quraıtyn 387 joba júzege asyryldy. Sonyń aıasynda 57 bilim berý, densaýlyq saqtaý, mádenıet jáne sport nysany salyndy jáne qaıta jóndeldi. Sonymen qatar, 330 áleýmettik nysan men aýylishilik joldar jańartyldy.
Atalǵan sharalar 142 aýyldyq eldi mekendegi 277 myńnan astam turǵynnyń turmys sapasyn jaqsartýǵa oń áser etti. Sonymen qatar, 1,6 myńnan astam jańa jumys orny ashyldy.
Oblystyq ekonomıka jáne bıýdjettik josparlaý basqarmasynyń basshysy Almagúl Shúgýrmakovanyń aıtýynsha, «bul joba aýyldy júıeli túrde damytýǵa serpin berip, halyq úshin jańa múmkindikter ashýda jáne áleýmettik, ınjenerlik ınfraqurylymnyń turaqty damýyna jol ashyp otyr».
Bıyl da jumys jalǵasýda. Buryn jasalǵan kelisimsharttar aıasynda taǵy 37 jobany aıaqtaý josparlanǵan. Qarjyny tıimdi ıgerý baǵytynda da josparly jumys júrip jatyr: aýyldyq okrýgterde josparlanǵan is-sharalardy iske asyrýǵa 18 mıllıard teńgeden astam qarajat baǵyttaldy.
Aýyldyq aýmaqtardy damytýdaǵy mańyzdy baǵyttardyń biri – eki memlekettik bastamany, ıaǵnı «Aýyl – El besigi» men «Aýyl amanaty» baǵdarlamalaryn biriktirý. Bul sınergııa aýyl kásipkerligin qoldaýdy kúsheıtip, naryq pen kólik-logıstıkalyq ınfraqurylymǵa qoljetimdilikti keńeıtedi, sondaı-aq jergilikti jerlerdegi ózekti máselelerdi jedel sheshýge múmkindik beredi dep kútilýde.
Aýyl – memleket nazaryndaǵy basty basymdyqtardyń biri. Aqmola oblysy aýyl turǵyndarynyń ómir súrý sapasyn arttyryp, aýyldardy tartymdy ári jaıly etý jolynda nyq qadamdar jasap keledi.