Mańyzdy salalardyń biri maqta sharýashylyǵy – halyqty jumyspen qamtýǵa jáne óńdeý ónerkásibin damytýǵa eleýli úles qosyp otyr. Maqta egiletin negizgi alqaptar Túrkistan oblysynda ornalasqan, 25 myńnan astam aýyl sharýashylyǵy qurylymynda shamamen 70 myń adam eńbek etedi, dep jazady Egemen.kz.
Byltyr 106,4 myń gektardy quraǵan, gektaryna 28,3 sentner ónim alynyp, nátıjesinde 301,7 myń tonna maqta shıkizaty jınalǵan. Al, bıyl zamanaýı tehnologııalardy qoldaný esebinen egis kólemin 135,2 myń gektarǵa deıin ulǵaıtý josparda tur.
Tamshylatyp sýarý tehnologııasy qoldanylatyn alqap kólemin 50 myń gektarǵa deıin ulǵaıtyp, dástúrli tásilmen egiletin egistik kólemin 19,3 myń gektarǵa azaıtý kózdelip otyr.
Aýyl sharýashylyǵy mınıstrliginiń baspasóz qyzmetiniń málimdeýinshe, memleket tarapynan maqta óndirýshilerge keshendi qoldaý kórsetilip jatyr. Atap aıtqanda: maqta ósirýdiń tolyq sıkline sýbsıdııa beriledi; mıneraldy tyńaıtqyshtar qunynyń 60%-na deıin; pestısıdterdiń 50%-na deıin; bıologııalyq agentter men bıopreparattardyń 40%-na deıin; túpnusqa jáne elıtalyq tuqym satyp alýǵa 70%-na deıin; maqta tuqymyna – 100% kólemde (basqa daqyldar úshin 15–50%); sýarmaly sý jetkizý shyǵyndaryn óteý – tehnologııa túrine baılanysty 50–85%; sondaı-aq ınvestısııalyq sýbsıdııalar qarastyrylǵan.
Qazaqstan jyl saıyn 300 myń tonnadan astam maqta shıkizatyn jáne 70–75 myń tonna maqta talshyǵyn óndirip, ónimniń 85%-y Latvııa, Túrkııa, Reseı, Qytaı jáne ózge elderge eksporttalady. Alaıda, qosylǵan qundy arttyrý jáne syrtqy naryqqa táýeldilikti azaıtý úshin tereń óńdeýdi damytý basty nazarǵa alynyp otyr.
Maqta salasyn damytý jónindegi Jol kartasy jáne maqta-toqyma klasterin qoldaý sheńberinde oblysta «Túrkistan maqta agroónerkásiptik kesheni» JShS men «Túrkistan áleýmettik-kásipkerlik korporasııasy» AQ-nyń qatysýymen iri ınvestısııalyq joba iske asyrylyp jatyr.
Jobanyń jalpy quny – 146,8 mlrd teńge, onyń sheńberinde 50 myń gektar egistik ıgerilip, sonyń 32 myń gektary bıyl tamshylatyp sýarylatyn bolady. 4 myńnan astam jumys orny ashý kózdelgen.