Keshe Ortalyq kommýnıkasııalar qyzmetinde «QazAgro» ulttyq basqarýshy holdıngi» AQ basqarma tóraǵasynyń mindetin atqarýshy Dáýren Maqajanov baspasóz máslıhatyn ótkizdi. Ol agrarlyq salada atqarylyp jatqan jumystar jóninde áńgimeledi.
Osydan alty jyl buryn aýyl sharýashylyǵyn damytýǵa Ulttyq qordan 120 mlrd. teńge bólinip, ol qarjy osy jyly tolyq ıgerilip bolýy tıis edi. D.Maqajanov kórsetilgen 120 mlrd. teńge aýyl sharýashylyǵyndaǵy qandaı ınvestısııalyq baǵdarlamalarǵa jumsalǵandyǵy týraly aıtty. «Búginde bul qarjy tolyǵymen ıgerilip, jańa óndiristerdi qurýǵa, kásiporyndardy jańǵyrtýǵa, eńbek ónimdiligin arttyrýǵa baǵyttaldy. Atap aıtqanda, osy baǵytta bólingen qarjyǵa mıkroklımatty jasaıtyn kompıýterlik júıemen 96 gektarlyq qazirgi zamanǵy jylyjaı keshenderi iske qosylady. Bul jylyjaı keshenderindegi óndiristiń jalpy kólemi 51 400 tonna qyzanaq pen qııardy quraıdy. Munymen birge, 4 800 gektar aýmaqqa tamshylatyp sýarý tehnologııalary engizildi. Bul turǵyda ónim shyǵymdylyǵy artady jáne sý únemdeledi», dedi ol.
Buǵan qosa, osynaý qarjyǵa 109 myń tonna sút ónimderi óndirisine arnalǵan iri sút fermalarynyń jelisi ashylypty. Sondaı-aq, 80 myń tonna et óndirýge múmkindik beretin qus fabrıkalarynyń jelisi iske qosylǵan. Bularmen birge, astyq qoımalarynyń qurylysyna nazar aýdarylyp, bıdaı saqtaıtyn qoımalardyń kólemi 762 myń tonnaǵa artypty. Al salynǵan kókónis saqtaıtyn qoımalardyń kólemi 123 800 tonnany quraǵan.
Buıyrtsa, bıylǵy jyly 50 mlrd. teńge somasyna 75 ınvestısııalyq jobany iske qosý josparlanyp otyr eken. «Holdıngtiń ınvestısııalyq jobalaryn iske asyrý sút ımportyn – 9, qus eti ımportyn – 17, kókónis ımportyn 4,1 paıyzǵa tómendetýge múmkindik beredi. Kókónis saqtaý qoımalarynyń tapshylyǵyn 62,4 paıyzǵa azaıtyp, 2016 jyly iri qara mal etiniń eksporttyq áleýetin qamtamasyz etedi. Jalpy, «QazAgro» holdınginiń ınvestısııalyq qorjynyna 315,2 mlrd. teńge bolatyn 506 joba kiredi. Bul 15,8 myń jumys oryndaryn qurýǵa múmkindik týdyrady. Qazirge 371 joba iske qosyldy. Onyń 236 jobasy, ıaǵnı 70 paıyzdan astamy tolyq qýatymen jumys istep tur. О́tken jyldyń qorytyndysy boıynsha, jalpy quny 39,3 mlrd. teńgeni quraıtyn 73 joba holdıng tarapynan qarjylandyryldy. Endi bıylǵy jyly 50 mlrd. teńge somasyna 75 ınvestısııalyq jobany iske qosýdy josparlaǵanbyz», dedi D.Maqajanov.
Nurbaı ELMURATOV,
«Egemen Qazaqstan».