Keshe Prezıdent janyndaǵy Ortalyq kommýnıkasııalar qyzmetinde «Qazaqstan-2050» jalpyulttyq qozǵalysy belsendileriniń qatysýymen brıfıng ótti. Onda qozǵalys keńesiniń tóraǵasy Danat Jumın uıymnyń jyl basynan beri atqarǵan jumysy jáne aldaǵy ýaqytqa belgilengen josparlary jóninde baıandap berdi.
«Qazaqstan-2050» jalpyulttyq qozǵalysy jastardyń qoǵam ómirine belsene aralasýyna jaǵdaı jasaý maqsatynda atqaryp kele jatqan jumystaryn oıdaǵydaı oryndap keledi. Máselen, ústimizdegi jyldyń basynan beri atalmysh uıym birqatar jańa jobalardy qolǵa alyp, olardy óz deńgeıinde júzege asyra bilgen.
Búginde 8 myń jas mamannyń basyn biriktirip, ortaq iske jumyldyryp otyrǵan qozǵalystyń tóraǵasy Danat Jumınniń sózine qaraǵanda, bul uıym Jeńistiń 70 jyldyǵyna oraılastyryp, 5-8 jáne 9-11 synyp oqýshylary arasynda respýblıkalyq esse baıqaýyn jarııalaǵan. «Jeńis» jobasynyń aıasynda uıymdastyrylǵan jas qalamgerler konkýrsyna elimizdiń barlyq óńirlerinen jáne shetelderden 1 500-ge tarta shyǵarma kelip túsken. Uly Otan soǵysynda qazaqstandyqtardyń erligin urpaqqa úlgi etip, olardy otansúıgishtikke tárbıeleý maqsatynda uıymdastyrylǵan baıqaýǵa joldanǵan esselerdiń aımaqtar boıynsha úzdikterin irikteý isi áli de júrgizilip jatqan kórinedi. Olardyń ishindegi tańdaýly esselerdiń avtorlaryna aqshalaı syılyqtar jáne gramotalar berilmek. Al jalpy baıqaý boıynsha «júzden júırik shyqqan» 3 jumys 15 mamyr kúni anyqtalmaq. Bul jeńimpazdar Bilim jáne ǵylym mınıstrliginiń arnaıy gramotalarymen marapattalady.
Sondaı-aq, «Qazaqstan-2050» qozǵalysynyń belsendileri «Qazposhta» aksıonerlik qoǵamymen birlese «Nurly Jol» baǵdarlamasy aıasynda salynatyn nysandarda jumys isteıtin jastar úshin de respýblıkalyq jobany qolǵa alypty. Dáliregi, «Qazposhtanyń» aýyldyq jerlerdegi bólimsheleri arqyly atalǵan baǵdarlama boıynsha jumysqa ornalasqysy keletin jastardan ótinish qabyldaý uıymdastyrǵan. Búginge deıin osy sanattaǵy 3 590 azamattan ótish túsipti. Qazirgi tańda bul jastarmen telefon arqyly baılanys ornatylǵan. Eń bastysy, Bilim jáne ǵylym mınıstrligimen birlese olardy «Jasyl El» jelisi jáne «Jumyspen qamtýdyń jol kartasy» baǵdarlamasy negizinde jumysqa turǵyzýdyń joldary qarastyrylýda.
Osy arada taǵy bir aıta keter jaıt, «Qazaqstan-2050» jalpyulttyq qozǵalysy memlekettik qyzmet kórsetýdiń sapasyn arttyrýǵa, sybaılas-jemqorlyqqa jaǵdaı týǵyzatyn ákimshiliktik kedergilerdi joıýǵa septigin tıgizý úshin I-Azamat jobasyn iske asyrýǵa qulshynys bildirip otyr.
Jalpy, búginde 8 myń jasty bir baǵytqa – elimizdiń damýyna qoldaý bildirýge jumyldyryp otyrǵan bul uıymnyń betalysy ońdy. Belsendi jastarymyzdyń óz Otandaryna degen qurmetterin osylaısha naqty ispen bildirýi, árıne, qýantarlyq jaıt.
Joldybaı BAZAR,
«Egemen Qazaqstan».