Men elimizdegi oń ózgeristerdiń barlyǵyn Elbasy Nursultan Nazarbaevtyń sarabdal saıasatkerligimen, kósemdik kóregendigimen sabaqtastyramyn. Jahandyq daǵdarys jaǵdaıynda elimizdi kez kelgen tyǵyryqtan alyp shyǵatyn dara tulǵa ekenine de bek senemin. Sebebi, Elbasynyń sózi men isi qashanda úılesim taýyp jatatynyna men ǵana emes, barsha qazaqstandyqtardyń kózi jetti.
Kúni keshe ǵana kezekten tys Prezıdent saılaýynda aıqyn basymdyqpen jeńiske jetti. Bul Nursultan Ábishulyna degen halqynyń qaltqysyz senimi, ystyq yqylasy desem aqıqattan attaı qoımaspyn. Memleket basshysy Prezıdenttik qyzmetke kirisý rásiminde sóılegen sózinde damýymyzdyń bolashaǵyn qolǵa ustatqandaı baıandap berdi. Bir aıta keterligi, jáı ǵana baıandaǵan joq, senimge selkeý túsirmeıtindeı etip, dáıektedi.
«Men ózimniń saılaýaldy tuǵyrnamam bolǵan 5 ınstıtýttyq reformany usyndym. 26 sáýir kúngi daýys berý qorytyndysyn men halyqtyń jedel túrde reformalar júrgizýge degen tikeleı mandaty retinde qabyldaımyn. Men reformalardy júzege asyrý úshin ózimniń barlyq erik-jigerimdi, sheshimdiligimdi kórsetip, memlekettik apparatty qoǵamnyń kúsh-jigerin reformalardy oryndaýǵa jumyldyrý nıetindemin. Asa taıaý ýaqytta el Prezıdenti janynan Jańǵyrtý jónindegi ulttyq komıssııa qurylatyn bolady», degen edi Elbasy sol sátte.
Aıtqandaı-aq, eldegi reformalardy júıeli júrgizýge birden bilek sybana kirisip ketkenin kózimiz kórip, kóńilimiz ańǵaryp otyr. Ýaqyttyń yrǵalyp-jyrǵalýdy kútpeıtinin, búgingideı kúrdeli kezeńinde shapshań jáne durys sheshim qabyldaýdyń úlgisin kórsetip úlgerdi.
Elbasy Jańǵyrtý boıynsha ulttyq komıssııany quryp, onyń mıssııasyna jatatyn 5 reformany kezeń-kezeńimen júzege asyrýdy basqaratyn jaýapty adamdardy da belgiledi. Bul Prezıdenttiń úlken isterge úlken daıyndyqpen, egjeı-tegjeıli zerttep, zerdelep baryp kirisetin kisilik kelbeti ekeni daýsyz. Elbasy aıtqandaı, Ulttyq komıssııa janynda quramy bedeldi sheteldik jáne qazaqstandyq sarapshylardan turatyn halyqaralyq konsýltatıvtik keńestiń jumys isteýi de bul baǵyttaǵy jumystardyń qaıtarymdylyǵyn qamtamasyz etetin qadam. Iаǵnı, ulttyq komıssııa ilgerileý men ilkimdi isterge berik tuǵyr qalaıtyn bolady. Jańǵyrtý jónindegi ulttyq komıssııanyń bes halyqtyq reformanyń oıdaǵydaı júzege asýyn ǵana qamtamasyz etip qoımaı, qanattas atqarylatyn jumystarǵa qozǵaý salyp, qarqyn bererine senim mol. Ulttyq komıssııa jumysynyń ultqa qyzmet etýiniń arqasynda burynǵydan góri de bıik belesterge qol jetkizemiz dep oılaımyn.
Muhtar MIROV,
Q.Jubanov atyndaǵy memlekettik óńirlik ýnıversıtetiniń tárbıe isi jáne áleýmettik-ekonomıkalyq máseleler jónindegi prorektory, professor.
Aqtóbe oblysy.