Jetisý oblysynyń turǵyndary Taldyqorǵan men Tekeli qalalary arasyndaǵy temirjol jelisin jolaýshylar tasymaly úshin paıdalanýdy surap, Jalpyulttyq sosıal-demokratııalyq partııasyna júgingen. Osyǵan baılanysty partııa depýtattary Kólik mınıstrine saýal joldap, Májilistiń jalpy otyrysynda osy máseleni kóterdi, dep jazady Egemen.kz.
JSDP depýtattary Naýryz Saılaýbaı, Ashat Rahymjanov, Nurlan Áýesbaev jáne Ajar Saǵandyqova Kólik mınıstri Marat Qarabaevtyń atyna joldaǵan depýtattyq saýalynda Taldyqorǵan men Tekeli qalalaryn baılanystyratyn temirjol jelisin jolaýshylarǵa da qoljetimdi etý qajettigin aıtty. Eki qala arasy nebári 50 shaqyrym bolǵanymen, qazirgi ýaqytta bul baǵytta tek júk poıyzdary ǵana qatynaıdy. Turǵyndar qolaısyz ári qaýipti jolmen júrýge májbúr. Sebebi óńirdiń taýly geografııalyq ereksheligine baılanysty avtokólik qatynasy jıi apatty jaǵdaılarǵa ushyraıdy. Kólik apattarynan adam shyǵyny da az emes, ásirese bul jaǵdaı kóktem, kúz jáne qys aılarynda jıi kezdesedi.
Partııanyń Jetisý oblystyq fılıaly bul máseleni qoǵamda birneshe márte talqylap, 2023–2024 jyldary aralyǵynda qoǵamdyq tyńdaýlar men dóńgelek ústelder ótkizgen. Qatysýshylardyń ortaq pikiri – Tekeli men Taldyqorǵan arasynda jolaýshylar poıyzyn júrgizý qajettiligi. Sonymen qatar, turǵyndar «Saryarqa – Jetisý» baǵyty boıynsha jańa marshrýt ashýdy surap otyr. Eger mundaı baǵyt iske qosylsa, óńirdiń kólik qoljetimdiligi artyp, týrıstik jáne ekonomıkalyq áleýeti jandana túser edi.
Saýalda temirjol baǵyty Tekeli – Qarabulaq – Kóksý – Úshtóbe – Mataı – Lepsi – Aqtoǵaı – Saıaq – Balqash – Moıynty – Aqadyr – Qaraǵandy – Astana – Býrabaı jelisimen júretin iri marshrýt retinde usynylǵan. Bul eldiń eki iri týrıstik aımaǵyn baılanystyratyn mańyzdy kólik torabyna aınalar edi. Depýtattardyń aıtýynsha, bul bastama kem degende 500 myń turǵynǵa tıimdi bolady. Sonymen qatar, eldegi ishki týrızmniń damýyna jol ashady.
Depýtattyq saýalda Kólik mınıstrine mynadaı eki suraq qoıylǵan: Tekeli men Taldyqorǵan arasyndaǵy temirjol jelisin jolaýshylar úshin paıdalanýǵa qandaı kedergiler bar? Sonymen qatar, Prezıdent Qasym-Jomart Toqaevtyń kólik ınfraqurylymyn damytý týraly tapsyrmasyna sáıkes, bul baǵyttaǵy poıyzdy iske qosýǵa múmkindik bar ma?
Depýtattar bul usynystyń oryndalýy turǵyndar úshin qolaıly jaǵdaı týǵyzyp qana qoımaı, memlekettik deńgeıdegi kólik jáne týrızm saıasatyna da serpin beretinine senimdi.
Damıra Tólegen,
EUÝ stýdenti