Halyq ónerimen myń jasaıdy. Ulttyń bar bolmysyn, dástúr-tarıhy men minezin ónerinen tanýǵa bolady. О́z topyraǵynan tamyr tartatyn ulttyq óner eshbir shekteý men shekaraǵa syımaıtyn, joǵary baǵa men maqtaý-madaqtan da bıik qasıetke ıe. Sonysymen de ol – óner.
Jalpy, ónerdi memlekettik deńgeıde baǵalaý, qoldaý, nasıhattaý keıde qarapaıym sharttylyq bolyp kórinedi. Desek te ulttyq ónerge degen qurmet ult mádenıetiniń ustynyn bıiktetedi, mártebesin kóteredi. Osy oraıda kúni keshe mereke qarsańynda Qazaqstannyń Eńbek Eri atanǵan ulttyq ónerdiń maıtalmany Qaırat Baıbosynovqa habarlasyp, quttyqtap, kóńil kúıin surap bildik.
«Adamnyń ómiri osyndaı júregin tolqytatyn ǵajap sátterden tursa kerek. Keýdede qýanysh bar. Kóp jylǵy eńbegim aqtalyp, memleket tarapynan elenip, joǵary baǵalanyp jatyr. Munyń bári, eń aldymen, halyqtyń arqasy. Prezıdenttiń aldynda da aıttym, ónerimizdi aspandatyp otyrǵan elime alǵys. Sanaly ǵumyrymdy qara dombyraǵa arnadym. О́tken ómirime qarasam, osy ónermen talaı el men jerdi aralappyz. О́zim qasıet dep tutqan osy joldan aınyǵan joqpyn. Qazir qandaı bir bıikte tursam, bul deńgeıge ultyma degen, ultymnyń ónerine degen sheksiz súıispenshilik jetkizip otyr.
Bul marapat – maǵan ǵana emes, dástúrli án ónerine berilgen baǵa. О́skeleń jastardyń ulttyq ónerge qulshynysy arta berse eken dep ómir boıy ustazdyq etip kelemin. Odan keıin kezinde maǵan sahnada qoshemet kórsetken halqyma rızashylyǵymdy aıtamyn. Sonaý Aqan, Birjan, Estaı, Úkili Ybyraı, Dánesh, bertindegi Júsipbek, Ǵarıfolla atalarymyzdyń rýhyna da taǵzym etkim keledi. Bul marapat – sol kisilerdiń eńbegi.
Osyndaı bıik marapattyń dástúrli ónerge berilip jatqany erekshe qýantady. Buny qoǵam da talqylap, ulttyq ónerge jasalǵan betburysty ıgi is dep qabyldap otyr. Shynynda da, dástúrli ónerimiz árqashan bıik turýy kerek. Dástúrimizdi, saltymyzdy, qundylyǵymyzdy ardaqtaý – paryz. Qazaqtyń jyry men kúıi – qazaqtyń jany, qany, júregi. Sondyqtan biz júregimizden aıyrylmaıyq», deıdi dástúrli án óneriniń dúldúli.