Aqmola oblysy men Estonııa Respýblıkasyndaǵy Muuga Grain Terminal astyq termınaly arasynda ózara yntymaqtastyq týraly ekijaqty memorandým qabyldandy. Qujat bıylǵy aqpanda oblys ákiminiń Estonııaǵa jasaǵan jumys sapary aıasynda rásimdelgen. Bul kelisim qazaqstandyq ónimdi Eýropa naryǵyna jańa logıstıkalyq baǵyt arqyly jetkizýge múmkindik berip otyr, dep habarlaıdy Egemen.kz.
Oblystyń ishki saıasat basqarmasynyń habarlaýynsha, búginde alǵashqy nátıjeler de bar. 2025 jyldyń basynan beri Aqmola oblysynyń eki kásiporny Italııaǵa 5,6 myń tonna astyq eksporttaǵan. Onyń ishinde 1,6 myń tonna ónim «Sodrýjestvo Treıd Vostok» JShS tarapynan Estonııa arqyly jóneltilgen.
«Eýropa baǵytyndaǵy eksporttyq logıstıkany damytý – aýyl sharýashylyǵy taýaryn óndirýshilerge tek turaqty ótkizý naryǵyn ǵana emes, sonymen qatar ónimniń básekege qabilettiligin arttyrýǵa da múmkindik beredi», delingen habarlamada.
Qazirgi tańda oblys ákimdigi bıznes ókilderimen birge eksporttyq geografııany keńeıtý, sondaı-aq astyqtan ózge aýyl sharýashylyǵy ónimderin syrtqy naryqqa shyǵarýǵa baǵyttalǵan jumystardy jalǵastyryp jatyr.