QOSTANAI. 6 mamyr. Qostanaılyqtar Jeńis kúni qurmetine elordada ótetin paradty tamashalaıtyn bir top soǵys ardagerlerin Astanaǵa shyǵaryp saldy. Bul týraly egemen.kz tilshisi habarlady.
Temirjol vokzalynyń perronynda tóselgen qyzyl kilemge jaǵalaı oryndyqtar qoıylyp, ardagerler sonda otyrdy. Almaty-Astana baǵytyna júretin «Tobyl» júrdek poıyzy kelip toqtady. Ardagerlerdi perronda úrmeli aspaptar orkestri soǵys jyldarynyń áýenderimen qarsy aldy. Astanadaǵy merekelik parad qyzyǵyn tamashalaıtyn 17 ardagerdi bes kútýshi alyp barady. Barlyǵy da 90-nan asqan, eń jasynyń ózi bıyl 90-ǵa keledi eken. Alaıda, kóńil degen kók dónen, keshegi soldattar soǵys ánderine kibirtiktep basyp júrip bılep te aldy.
- Soǵys bastalǵan meniń jasym jetpedi. On jetige 1943 jyly toldym, sol jyly maıdanǵa attandym, Belorýssııa maıdanynda boldym, Belorýssııany, Polshany azat etýge qatystym. Elge tek 1950 jyly ǵana oraldym,-deıdi Astanaǵa Áýlıekól aýdanynan bara jatqan soǵys ardageri Aldabergen Kachkın. — Nesin aıtasyń, 70 jyl ótse de soǵys lańy kóz aldymda. Oder ózeninen ótkende eki joldasym sýǵa ketti. Biz áıteýir ajaldyń joǵynan ózenniń shetine zorǵa shyǵyp, tiri qaldyq. Sol jigitter esime túsedi. Mundaı paradqa alǵash bara jatyrmyn, Allanyń bergenine shúkir.
Ardagerlerdiń barlyǵy da ózderine kórsetilip jatqan qurmetke rıza. Olarǵa arnap paradta kıetin birińǵaı kıim tigildi. Olardy Astanaǵa shyǵaryp salýǵa oblys, Qostanaı qalasynyń basshylary keldi. Poıyz júrerdiń aldynda ardagerlerge oblys ákimi Nuraly Sádýaqasov aqjol tiledi.
Nuraly Sádýaqasov: «Sizder bizdiń elimizde ótkeli otyrǵan merekelik Jeńis paradyna júrgeli otyrsyzdar. Elimizde mundaı deńgeıdegi parad áli bolǵan emes. Onda tamasha saltanatty, elimizdiń jaqynda ǵana qaıta saılanǵan Elbasymyzben kezdesesizder. О́kinishke qaraı kóptegen ardagerler bul kúndi kóre almady. Astanaǵa aman-esen, kóńildi baryp kelińizder! Merekelerińiz qutty bolsyn!», dedi.
Ardagerler Astanaǵa barǵan soń demalady, qart kisilerdiń paradqa sergek shyǵýy úshin olardyń densaýlyǵyna qaraý, demaldyrý jiti baqylanady. Búginde oblysta 338 soǵys ardageri bar. Sonymen qatar áleýmettik jeńildikter men kepildikter soǵys ardagerlerine teńestirilgen 11 myń adam turady.
Názıra Járimbetova.
Derek, sýret: egemen.kz