QOSTANAI. 6 mamyr. Qostanaıda general-maıor Talap Qabdenovtyń 70 jasqa tolýyna oraı oǵan qurmet kórsetildi. Bul týraly egemen.kz tilshisi habarlady.
Qazaqstan Respýblıkasy Ishki ister mınıstrliginiń eńbek sińirgen qyzmetkeri, Halyqaralyq aqparattandyrý akademııasynyń akademıgi, professor, quqyqtaný dosenti, general-maıor Talap Qabdenovtyń eńbek jolynyń birazy Ishki ister mınıstrliginiń vedomstvolyq bilim berý isin qalyptastyrý men ony damytýǵa arnaldy. Ol Ishki ister mınıstrliginiń Qostanaı akademııasynyń qurylýyna úlken eńbek sińirgen bolatyn. Oqý orny qazir elimizdegi irgeli bilim ordasyna aınaldy. Odan ishki ister salasynyń tamasha mamandary ósip shyqty.
Toı ıesin oblys ákimi Nuraly Sádýaqasov quttyqtap, ıyǵyna shapan japty.
Nuraly Sádýaqasov: «Uly Jeńistiń qurdasy Talap Qabdenulynyń kúsh-jigeri, ómirge yntyzarlyǵy, Otanǵa qyzmeti barlyǵymyzǵa úlgi bolarlyq. Ol Qostanaıdaǵy shaǵyn zań kolledjin búgingideı biregeı akademııaǵa aınaldyrýǵa eren eńbek etti. 1996 jyl aýyr ýaqyt edi. Sol jyldardyń ózinde múmkindikter taýyp, akademııanyń materıaldyq bazasyn nyǵaıtty. Qazir bul oqý orny ishki ister salasyna bilikti mamandaryn, jetekshi kadrlaryn daıyndaıdy. Kapıtan sheninen general-maıorǵa deıin ósý ómirde jaýapkershilikti aldyńǵy orynǵa qoıatyn Talap Qabdenulynyń adal eńbeginiń arqasy bolatyn. Al mundaı ómir jastarǵa úlgi», dedi.
Generalǵa arnalǵan saltanatty keshte onyń zamandastary, ýaqytynda qyzmettes bolǵan Kenjebek Ýkın, Toqtarbaı Qadambaev sóz alyp, toı ıesine izgi tilekter aıtty. Munan keıin jınalǵandar oblystyq fılarmonııa ónerpazdarynyń kúshimen qoıylǵan konsertti tamashalady. Konsertte kompozıtor Qalıbek Deripsaldın «Talap aǵa» atty jańa ánin tartý etti.
Názıra Járimbetova.
Derek, sýret: egemen.kz