Birikken Arab Ámirlikterinde bas konsýldyq pen kásipkerlerdiń tikeleı qoldaýymen qazaq mádenı ortalyǵy ashyldy. Atalǵan uıym sheteldegi otandastardy biriktirip, ulttyq qundylyqtardy nasıhattaýdy maqsat etedi.
Resmı málimetterge súıensek, Ámirlikterde elimizdiń 12 myńǵa jýyq azamaty turady. Olar memlekettik merekelerde jıi bas qosyp, túrli mádenı is-sharalar uıymdastyrady. Jańadan qurylǵan mádenı ortalyqta qazaqy ortaǵa arnalǵan semınar-trenıng, sheberlik sabaqtary men bıznes kezdesýler ótip turmaq. Odan bólek elimiz úshin mańyzdy datalarda buqaralyq is-sharalar ótkizip, qazaqy salt-dástúrlerdi tanytý da josparda bar.
«Bas konsýldyq jáne birqatar otandyq kásipker, demeýshiler atsalysyp, osy ortalyqtyń ashylýyna sebepker boldy. Jalpy, biz bolashaqta ortalyqta kóptegen mádenı is-shara ótkizemiz dep oılaımyn», deıdi Qazaqstannyń Dýbaıdaǵy bas konsýly Almaz Tasbolat.
Al Qazaqstan – BAÁ iskerlik keńesiniń teń tóraǵasy Álibek Almabekov bul bastama eki el arasyndaǵy mádenı baılanystarǵa da úlken septigin tıgizetinin atap ótti.
«Mundaı ortalyqtar Qazaqstan men BAÁ arasyndaǵy mádenı-gýmanıtarlyq, dostyq jáne yntymaqtastyq baılanystardy damytýǵa, sondaı-aq osy ortalyq arqyly elimizge kóptegen týrıst tartýǵa yqpal etedi dep senemiz. Ortalyqta aldaǵy ýaqytta aǵartýshylyq baǵytta birqatar kýrs ashylýy múmkin. Kelýshiler tarapynan suranys bolsa, munda qazaq tili men tarıhyn oqytý isi qolǵa alynady. Ol úshin birneshe oqý bólmesi jáne ınteraktıvti qurylǵylar bar. Bastama elder arasyndaǵy dostyq baılanysty nyǵaıtýǵa baǵyttalǵan», dedi ol.
Mádenı ortalyqtaǵy ár kabınetke elimiz qalalarynyń ataýy berilgen. Sondaı-aq birlik pen tutastyqtyń rámizi – shańyraqty da kórýge bolady.