Bıylǵy oqý jylynda Soltústik Qazaqstan oblysy kólemindegi 444 mektepte 1-11 synyp aralyǵynda 74 myń oqýshy bilim aldy. Sondaı-aq óńirde 104 qazaqsha, 232 oryssha jáne 108 aralas mektep bar. Oqýshylardyń ıaǵnı 56 686 bala, 75,3 paıyzy, oryssha oqıdy.
Orys tilinde bilim alatyn qazaq balalarynyń sany áli kúnge kóp. Mysaly, Petropavl qalasyndaǵy 10 538 qazaq balasynyń 5 553, ıaǵnı 53 paıyzy ótken oqý jylynda ózge tilde bilim aldy. Al balabaqshadaǵy 3 690 qazaq balasynyń 1 910, ıaǵnı 52 paıyzy orys tilinde tárbıelenip jatyr.
«Qazaq tili» qoǵamy oblystyq fılıalynyń tóraǵasy Janat Muhamedjanovtyń aıtýynsha, memlekettik tilde oqytatyn mektepterge baratyn balalar sanyn arttyrý úshin mektepke deıingi uıymdarda ata-analarymen túsindirý jumystaryn júrgizý qolǵa alynǵan. «Sonyń nátıjesinde jyl saıyn qazaq mektepterine 1-synypqa baratyn balalar sany artyp keledi. Máselen, 2024–2025 oqý jylynda 1,4%-ǵa ósip, barlyǵy 27,6%-dy qurady. Al 2023–2024 oqý jylynda ol – 26,2 %,-dy qamtysa, 2022–2023 oqý jylynda – 22,9% bolǵan edi», deıdi ol.
Oblys kóleminde osy oqý jyly 23 mamyrda aıaqtaldy. Barlyq mektepte «Bilimim – Otanyma!» atty respýblıkalyq synyp saǵaty ótti. Al mektepaldy daıarlyq synyptarynda sabaq 30 mamyrda támamdalady.
«Synyp saǵatynyń negizgi maqsaty – oqýshylardyń ustazdaryna degen qurmetin, bilim alýǵa degen umtylysyn jáne oqý jylyndaǵy jetistikterin obektıvti baǵalaý qabiletin qalyptastyrý. Sonymen qatar osy kúni barlyq bilim alýshylar arasynda «Taza Qazaqstan», «Zań jáne tártip», «Adal azamat» taqyryptary boıynsha esse baıqaýy ótkizildi», dedi oblystyq bilim basqarmasynyń basshysy Aınagúl Suraǵanova.
Bıyl Soltústik Qazaqstan oblysy boıynsha mektepti «Altyn belgimen» bitirýge 122 túlek talaptanyp otyr. Bul byltyrǵyǵa qaraǵanda 36 oqýshyǵa artyq. Olardyń jazbasha jumystaryn oblystyq komıssııa tekseredi. Sondaı-aq mektepti «Úzdik attestatpen» bitirýge 230 túlek úmitker.
Ulttyq biryńǵaı testileý 16 mamyrda bastalyp, 4 shildede aıaqtalady. Byltyr soltústiktiń túlekteri UBT boıynsha 78,3 ball alǵan edi. Bıyl oblysta eki testileý pýnkti daıarlanǵan, bireýi – Petropavl qalasynda, ekinshisi – Ǵ.Músirepov aýdanynyń ortalyǵynda. Qazirgi tańda UBT-ny ótkizý jónindegi memlekettik komıssııa quryldy.
Soltústik Qazaqstan oblysy