Keshe, 27 mamyrda túnde Qyzylqoǵa aýdanynyń Saǵyz aýylynda atys boldy. Úsh adamǵa oq atqan kúdikti áli ustalmaǵan, dep jazady Egemen.kz aqparat agenttigi.
Atyraý oblystyq polısııa departamentiniń málimetine súıensek, qazir atalǵan derekke qatysty qylmystyq is qozǵaldy.
«Tergeý kezinde oqıǵanyń barlyq mán-jaıy anyqtalatyn bolady. Polısııa qyzmetkerleri qaqtyǵysqa qatysýshylardy anyqtaý, ustaý úshin keshendi sharalar qoldanýǵa kiristi. Qylmystyq isti tergeý departament basshylyǵynyń baqylaýyna alyndy», dep málimdedi departamenttiń baspasóz qyzmetinen.
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, Saǵyz aýylynan úsh er adam túrli dene jaraqatyn alǵan.
«Sanavıasııa qyzmetimen bir adam jedel túrde oblystyq aýrýhanaǵa, ekeýi aýdandyq aýrýhanaǵa jetkizildi. Qazir medısına qyzmetkerleri jedel áreket etip, jaraqat alǵandarǵa tıisti alǵashqy medısınalyq kómek kórsetti. Jaraqat alǵandarǵa shokqa qarsy jáne qan toqtatýshy terapııalar, aýyrsynýdy basý úshin em-dom júrgizildi. Naýqastarǵa ottegimen emdeý jáne ınfýzııalyq terapııa taǵaıyndaldy», dep habarlady basqarmanyń baspasóz qyzmeti.