Pavlodardaǵy Bellagio meıramhanasynda ótken banketten soń 34 adam, onyń ishinde bir bala, tamaqtan ýlaný belgilerimen dárigerge júgindi; sanıtarlyq tekseris meıramhananyń ruqsat qujatynsyz jumys istegenin anyqtap, nysannyń qyzmetine birden tyıym saldy.
Zardap shekkenderdiń 20-sy aýrýhanaǵa jatqyzylsa, qalǵandary úı jaǵdaıynda em qabyldaýda. Aqylbekovanyń aıtýynsha, jappaı ýlaný deregi resmı túrde tirkelgen. Al zardap shekkenderdiń týystary banketke 50-ge jýyq adamnyń qatysqanyn jáne olardyń kópshiligi ózin nashar sezingenin habarlaǵan. Keıbir qonaqtar jedel járdem shaqyrmaǵan.
– 8 maýsym kúni bizge aqparat tústi. Sol kúni epıdemıologııalyq tergeý bastaldy. Aldyn ala málimetterge sáıkes, meıramhana sanıtarlyq-epıdemıologııalyq qorytyndysyz, ıaǵnı ruqsat qujatynsyz jumys istegen, – dedi Aqylbekova.
7 maýsymda saǵat 13:00-de nysanǵa tekserý júrgizilip, saǵat 16:00-de meıramhananyń jumysyna ýaqytsha tyıym salý týraly qaýly shyǵarylǵan. Bellagio ákimshiligi bul sheshimmen jazbasha túrde tanysqan. Alaıda zardap shekkenderdiń týystary meıramhana qaýlyǵa qaramastan jumysyn jalǵastyrǵanyn aıtýda. Sol kúni saǵat 18:00-de mekemede taǵy da qonaqtar qabyldanǵany beınejazba arqyly rastalǵan.
Sanıtarlyq qyzmettiń málimetinshe, mekemede medısınalyq tekserýden ótpegen jeti qyzmetker jumys istegen. Qazirgi ýaqytta olardyń da qyzmetine tyıym salynǵan.
Meıramhanany tekserý nátıjeleri bir apta ishinde daıyn bolady. Sodan keıin materıaldar qylmystyq is qozǵaý úshin polısııaǵa joldanady.
Janel TО́LEÝBEKOVA, EUÝ stýdenti