Atyraý oblysy boıynsha ekonomıkalyq tergep-tekserý departamenti 2024 jyldyń tamyz aıynda «Delta» massıvtik ataýy qoıylǵan topty áshkerelep, qyzmetin joıdy. Bul top 2023–2024 jyldary tıisti jumysty atqarmaǵan, biraq jalǵan shot-faktýrany qoldanyp, salyq tóleýden jaltarý maqsatynda 3 mlrd teńgeden astam aqshany qolma-qol túsirgen.
Al 2019–2024 jyldary «Atyraý munaı óńdeý zaýyty» JShS-nyń burynǵy bas dırektorlary Sh.Danbaı men M.Dosmuratovqa qatysty ókilettigin asyra paıdalaný jáne salǵyrttyq faktileri boıynsha qylmystyq is qozǵaldy. Olardyń zańsyz áreketine baılanysty is sotta qaraldy. Sot úkimimen olar sottaldy. Sh.Danbaı isi boıynsha memleket kirisine 2,9 mlrd teńge óndirildi. M.Dosmuratovtan 1,9 mlrd teńge qaıtaryldy. Bizge bul týraly derekti Oblystyq ekonomıkalyq tergep-tekserý departamentiniń shtab bastyǵy Bekbolat Ánesov aıtyp berdi.
Onyń sózinshe, «Atyraý munaı óńdeý zaýytyna» qatysty eń mańyzdy nátıje retinde satyp alatyn qyzmetter men qyzmet qunyna áser etken taýarlar tizbegindegi artyq deldaldar joıylǵanyn aıtýǵa bolady. Máselen, «ENERTEK», «NNS LTD», «KTR», «IQS» kompanııalarynyń «AMО́Z» JShS-men baılanysty aýtsorsıng jónindegi sharttary buzylǵan. Olarǵa zaýyt quramyndaǵy 4 seh jabdyǵymen, 1 qyzmetker shtatymen birge berilgen.
«Osyndaı ónimsiz deldaldardyń jyl saıynǵy tabysy 7 mlrd teńgeden, al paıdalaný kezeńinde 30 mlrd teńgeden astam qarjyny qurady. Munyń bári zaýyt bıýdjeti arqyly ótip kelgen. Tergeý sheńberinde memleketke №6 park avtonomdy quıý stansasymen AMО́Z boıynsha negizsiz jasalǵan sharttar buzyldy. Múliktik keshender qaıtaryldy. Sotqa deıingi tergeý barysynda memleket paıdasyna quny 2,2 mlrd teńge bolatyn suıytylǵan munaı gazyn saqtaý parkiniń 50% úlesi qaıtaryldy», dep málim etti departamenttiń shtab bastyǵy.
Departament ókiliniń pikirinshe, Atyraý oblysy jalpy memlekettik reıtıngte kóleńkeli ekonomıkanyń úlesi tómen óńirler arasynda 3-orynda tur. Qazir munaıly óńirdiń aldynda Astana men Almaty qalasy bar.
«Kóleńkeli kásipke úıir bolatyndar men ekonomıkanyń damýyn tejeıtin salalarǵa monıtorıng júrgizý jalǵasa beredi. Qazir Atyraý oblysynda kóleńkeli ekonomıka deńgeıine teris áser etetin negizgi eki baǵyt bar. Máselen, aýyl sharýashylyǵy salasyndaǵy ósim 0,01, al kóterme, bólshek saýdada bul kórsetkish 0,02%-dy qurap otyr», dep naqtylady B.Ánesov.
О́ńirdegi baqylanbaıtyn ekonomıkanyń úles salmaǵy 2021 jyly 1,57% bolyp, 2022 jyly 1,48%-ǵa tómendegen. Eń eleýli tómendeý kórsetkishi 2023 jyly 1,19%-ǵa jetti. Oń dınamıka ónerkásipte, onyń ishinde karer qazý, qurylys, kólik jáne qoımalaý salasynda baıqalyp otyr.
Atyraý oblysy