О́ńirde qaldyqtardy basqarý ınfraqurylymyn damytý úshin «Jasyl Damý» AQ arqyly eki ınvestısııalyq joba qolǵa alynǵan. Kógaldandyrý baǵytynda 31 568 túp aǵash otyrǵyzý josparlanyp, onyń 45%-y oryndalǵan, dep jazady Egemen.kz.
Mańǵystaý oblystyq tabıǵı resýrstar jáne tabıǵat paıdalanýdy retteý basqarmasynyń basshysy Sábıt Dúısekenovtiń aıtýynsha aımaqta «Taza Qazaqstan» aksııasy aıasynda aýqymdy jumystar atqarylǵan.
«Bıyl ekologııalyq naýqanǵa oblys boıynsha 25 myńnan astam turǵyn qatysyp, 4200 túp aǵash otyrǵyzyldy. Is-shara barysynda 448 tehnıka jumyldyrylyp, jalpy kólemi 3540 tonna turmystyq jáne qurylys qaldyqtary shyǵaryldy. Sondaı-aq, azamattardyń ekologııaǵa qatysty shaǵymdary men usynystary «Tazaqazaqstan.kz» platformasy arqyly turaqty túrde qabyldanyp, ýaqytyly jaýaptar berilýde», dedi Sábıt Dúısekenov.
О́tken jyly ǵaryshtyq monıtorıng nátıjesinde 68 qoqys alańy anyqtalyp, onyń 64-i joıylǵan. «Kishi Oımashy» kóliniń mańynda 540 tonna qoqys shyǵarylyp, tazalyq jumystary júrgizilgen.
Sondaı-aq, «Qoshqar-Ata» qaldyq qoımasyn qalpyna keltirý jumystary daıyndyq kezeńinde. 2025-2027 jyldary 400 gektar aýmaqqa sekseýil kóshetteri otyrǵyzylady dep josparlanǵan.
Alına QAIRATQYZY, EUÝ stýdenti