Áke men balanyń sport básekelerinde birge óner kórsetýi, ekeýiniń de el abyroıyn asqaqtatyp, bási bıik dodada top jarýy – sırek kezdesetin, ańyzǵa bergisiz jaǵdaı. Shet aýdany Aqadyr kentiniń turǵyndary, ákeli-balaly Dáribaı Ospanov pen Abdýlkárim Qaraman sondaı jandar.
Qos sportshy sporttyń eń aýyr ári kúrdeli túri paýerlıftıngten el namysyn qorǵap, tórtkúl dúnıeni tamsandyryp keledi. Jaqynda Norvegııanyń Drammen qalasynda paýerlıftıngten álem chempıonaty ótti. Baıraqty básekege álemniń 14 elinen 1400-den astam ziltemirshi qatysyp, ózara myqtyny anyqtady. Osy chempıonatta ákeli-balaly sportshylar el baıraǵyn kókke kóterdi.
Dáribaı Qaramanuly dodada 70 jastan asqan ardagerler arasynda, 93 kıloǵa deıingi salmaq dárejesinde óner kórsetti. Nátıjesinde, paýerlıftıngtiń klassıkalyq túrinen qola, arnaıy jabdyqpen kóterýden altyn medal enshiledi. Osylaısha, ardagerdiń halyqaralyq jarystardan alǵan medal sany 22-ge, álem birinshiliginen alǵan júlde sany 10-ǵa jetti. Onyń beseýi altyn, tórteýi kúmis, bireýi qola júlde. Osy ýaqytqa deıin Azııadan on altyn, eki kúmis medal enshilepti.
Uly Abdýlkárim Qaraman da chempıonatta qos altynǵa qol jetkizdi. Sportshy óz salmaǵynda jarystyń klassıkalyq túrinen 190 kılogrammdy baǵyndyryp, qara úzdi. Arnaıy jabdyqpen kóterý atalymynda da 245 kg kóterip, qarsylastaryna esh múmkindik bermedi.
– Abdýlkárim osy chempıonatta halyqaralyq tóreshiler qaýymdastyǵynyń qataryna enip, tóreshilik etti. Ári ózi de saıysqa túsip, qos altynnyń ıegeri atandy. Ulym shetel jarystarynda 20 medal enshilegen. Álem chempıonatynan jeti altyn, jeti kúmis, Azııa birinshiliginen alty altyn taqqan, – deıdi Dáribaı Qaramanuly.
Aıta keteıik, ulttyq qurama sportshylary qos saıysta da jalpykomandalyq esepte kósh bastady. Erler arasynda synǵa túsken aqtaýlyq Asqar Shoqanov absolıýttik chempıon atandy.
Dáribaı aqsaqal álemdik rekordty qaıtalaǵan sportshy. О́z salmaq dárejesinde 180 kg ziltemir kótergen. 56 jasynan bastap paýerlıftıngke den qoıǵan aqsaqal Azııa birinshiliginde Gonkong, Fılıppın, Úndistanǵa bardy. Álemdik birinshilikte AQSh, Chehııa, Japonııa tórinde óner kórsetti.
– Men ınjener-geodezıst bolyp jumys istedim. Qubyr tartyp dalada júrgende bos plastmassa qutylarǵa qum toltyryp, kóterip jattyǵatyn edim. Sodan álemdik deńgeıge shyqtym. Alǵash ret 2008 jyly Gonkongtegi Azııa birinshiliginde kúmis júldeger atandym. Odan keıin Fılıppınde altyn aldym. 2012 jyly AQSh-ta kúmis ıelenip, Halyqaralyq dárejedegi sport sheberi normasyn oryndadym, – deıdi D.Ospanov.
Osydan eki jyl buryn Prezıdent Qasym-Jomart Toqaev Aqordadan Aqadyrdaǵy paýerlıftıng chempıony Dáribaı Ospanovqa arnaıy tartý-taralǵy berip jibergen edi. Alǵys hat pen arnaıy tartýdy óńir basshysy Ermaǵanbet Bólekpaev tabystady. Prezıdent chempıonǵa Alǵyshatpen birge estelik saǵat, Býrabaı shıpajaıyna joldama syılady. Oblys ákimdigi de chempıondy qur qol jibermeı, Aqadyrdyń sport mektebine halyqaralyq deńgeıdegi shtanga jıyntyǵyn alatyn 10 mln teńge sertıfıkat tartý etti.
Qaraǵandy oblysy