Bilim men ǵylym ordasy, joǵary oqý ornynyń júregi – kitaphana. Qazaq ulttyq qyzdar pedagogıkalyq ýnıversıtetiniń kitaphanasy – tarıh tereńinen tamyr tartatyn, ult ustazdary qalyptastyrǵan rýhanı orta. 2024 jyly bul ortalyq jańa keıipke enip, kúrdeli jóndeýden ótti. Sonymen qatar kitaphanaǵa elimizdiń bilim salasyna ólsheýsiz úles qosqan ulaǵatty ustaz, fızıka-matematıka ǵylymdarynyń kandıdaty Seraly Qanıevtiń esimi berildi.
Qyzdar ınstıtýtyndaǵy kitaphana 1945 jyly qurylyp, alǵashqy meńgerýshisi Qalıla Ismagýlova boldy. Alǵashqy kitap qory nebary 3190 danadan tursa, onyń deni oqytýshylar men qyzmetkerlerdiń jeke kitaptarynan quralǵan. Tuńǵysh rektor Tursyn Myrzabekovanyń Máskeý men Lenıngrad qalalarynan ákelgen qundy eńbekteri kitaphananyń qoryn baıytty. Keıinirek, 1980 jyldary rektor Jámılá Elemesova men kitaphana dırektory Raýshan Áıtıeva jańa kitaphananyń irgesin qalap, 1985 jyly jańa ǵımarat paıdalanýǵa berildi. Bul kezeńde QazKSR Memjospar tóraǵasy Muhamed-Rahımov kitaphana qurylysyna jeke baqylaý jasaǵanyn atap ótken jón.
40 jylǵa jýyq Qyzdar ınstıtýtynda eńbek etken Seraly Qanıuly Qanıev – tek bilim men ǵylymǵa ǵana emes, izgilik pen parasattylyqqa negizdelgen ulaǵat ıesi. Ǵylym men pedagogıkany ushtastyra otyryp, san myńdaǵan shákirt tárbıelegen ol – Qazaq SSR aǵartý isiniń úzdigi, KSRO Joǵary mektebiniń úzdigi atanǵan. Seraly Qanıuly – esepterdi biriktirip sheshýdiń ózindik amaldaryn ashyp, oqytýda jańashyl ádisterdi usynǵan ǵalym. Onyń taǵylymdy joly – búgingi jasqa baǵyt, erteńgige mura.
Jańǵyrtylǵan kitaphana zamanaýı talaptarǵa saı qaıta jabdyqtaldy. Bul aýqymdy joba belgili kásipker, bilim men mádenıet janashyry Berik Qanıevtiń qoldaýymen júzege asyryldy. Jobaǵa halyqaralyq dızaınerler men sáýletshiler tartylyp, kitaphana keńistigi jańa mazmunmen tolyqty jáne oǵan ... mln ınvestısııa quıyldy. Bul – ınvestısııa ǵana emes, bolashaqqa salynǵan rýhanı kapıtal.
Kitaphananyń birinshi qabatynda stýdentter men oqytýshylar úshin qolaıly, kópfýnksııaly aımaqtar uıymdastyrylǵan. Atap aıtqanda, akademııalyq jazylym ortalyǵy, 72 oryndyq konferens-zal (sınhrondyq aýdarma kabınasymen), Mosaic kafesi, toptyq jáne jeke jumys kabınalary, zamanaýı kompıýterlik synyp, demalys bólmesi, balalarǵa arnalǵan oıyn alańy, ana men bala bólmesi, ınklıýzıvti sanıtarlyq toraptar. Kitaphana keńistigi LCC (Library of Congress Classification) júıesi boıynsha jabdyqtalyp, ashyq qor prınsıpi engizilgen. Stýdentter men oqytýshylar kitaptardy óz betinshe tańdap, zamanaýı elektrondy resýrstarǵa erkin qol jetkize alady.
Kitaphana janyndaǵy akademııalyq jazylym ortalyǵy stýdentterdiń jazý daǵdysyn jetildirýmen qatar, jarııalanym mádenıetin, akademııalyq adaldyq prınsıpterin qalyptastyrýǵa baǵyttalǵan. Sonymen qatar munda soft skills daǵdylaryn damytýǵa arnalǵan trenıngter men vorkshoptar ótedi.
Ýnıversıtet aýmaǵynan tabylǵan, 1970 jyldary Moldahmet Kenbaev pen Nıkolaı Sıvchınskıı salǵan mozaıkalyq panno da 2024 jyly qaıta qalpyna keltirilip, kitaphana mańyna ornatyldy. Bul – ótkenge taǵzym, bolashaqqa baǵdar.
Seraly Qanıev atyndaǵy ǵylymı kitaphana – tek aqparat kózi emes, ol – izdenistiń, zertteýdiń, damýdyń ordasy. Bul jańartylǵan keńistik ýnıversıtetimizdiń zamanaýı bilim berý úrdisterine beıimdelýiniń, sapaly kadr daıarlaý jolyndaǵy jańa qadamynyń naqty aıǵaǵy.
Gúlmıra Qanaı, Qazaq ulttyq qyzdar
pedagogıkalyq ýnıversıtetiniń basqarma tóraǵasy – rektory