Ádebıet álemine súbeli úles qosyp júrgen qalamgerler elimizdiń ár túkpirinen tabylady. Alaıda olardyń birqatary ádebı ortadan jyraq. Kitaptary kóp nasıhattala bermeıdi. Sondyqtan ózderi de jıi atalmaıdy.
M.Áýezov atyndaǵy Ádebıet jáne óner ınstıtýty mine, osyndaı olqylyqtyń ornyn toltyrýdy maqsat etip, «Qazaqstan ádebıettanýy, folklortanýy jáne ónertanýy ekojúıesiniń sıfrlyq transformasııasy: pánaralyq zertteýler» atty joba ázirlepti. Osy joba boıynsha óńirlerdegi qalamgerlerdiń shyǵarmalaryn nasıhattaý, olardyń eńbekteri negizinde ujymdyq monografııa jazý jáne úzdik týyndylardy ǵylymı aınalymǵa shyǵarý kózdelgen.
Jýyrda M.Áýezov atyndaǵy Ádebıet jáne óner ınstıtýtynyń qyzmetkerleri, fılologııa ǵylymdarynyń doktory, professor Gúljahan Orda men doktorant Jansulý Sársenbaeva Túrkistan oblysy men Shymkent qalasynda turatyn qalamgerlerdiń basyn qosyp, «О́lkelik ádebıetti zertteý» atty syr-suhbat uıymdastyrdy. Kezdesýde Jazýshylar odaǵynyń Shymkent qalasy boıynsha ókili Mombek Ábdiákimuly, jazýshylar Zahardın Qystaýbaev, Sarmanbaı Isahov, aqyndar Bóribaı Orazymbetov, Nurǵısa Tóremuratov, Nurǵalı Serdalıev, taǵy basqalar sóılep, qazirgi qazaq ádebıeti jónindegi oılaryn ortaǵa saldy. Sonyń ishinde óńir qalamgerleriniń tańdaýly shyǵarmalaryn kitap etip bastyrý úshin memlekettik qoldaý kórsetý kerektigi týraly da aıtyldy. О́z kezeginde Gúljahan Jumaberdiqyzy jaqsy týyndylardy nasıhattaý jáne olar jóninde mınıstrlikke, baspalarǵa jáne basqa da tıisti oryndarǵa habarlap otyrý mindetterine jatatyndyǵyn jetkizdi.
Munan soń Gúljahan Orda M.Áýezov atyndaǵy Ádebıet jáne óner ınstıtýtynyń qoldaýymen shyqqan «HHI ǵasyr ádebıettanýy: Termınder sózdigi», «Qazirgi poezııadaǵy modıfıkasııa: stıl, yrǵaq, forma», «Qazirgi balalar ádebıeti», «Jańa qazaq ádebıeti» jáne «Balalar ádebıetiniń pánaralyq aspektileri» degen zertteý eńbekterin tanystyrdy. Atalǵan kitaptardy qalamgerlerge syıǵa tartty.
Sabyrbek OLJABAI