Maýsym aıynyń sońyna deıin QR ortalyq memlekettik organdarynyń qyzmetkerleri citizensec.kz portalynda arnaıy onlaın-oqýdan ótip, sıfrlyq qaýipsizdik deńgeıin arttyrady, dep jazady Egemen.kz.
Bul bilim berý bastamasy kıbergıgıena mádenıetin nyǵaıtýǵa jáne iri derektermen jumys isteý barysynda adamı faktorǵa baılanysty qaýip-qaterlerdi azaıtýǵa baǵyttalǵan.
Baǵdarlama shamamen 7 saǵattyq beınesabaqtardy qamtıdy. Onda jeke derekterdi qorǵaý, fıshıngtik shabýyldardy taný, sıfrlyq etıka, senimdi qupııasózdermen jumys isteý jáne basqa da mańyzdy taqyryptar qarastyrylǵan. Kýrstar jeke ótýge yńǵaıly formatta usynylǵan, al materıaldar sala mamandarymen qatar memlekettik organdardyń basshylaryna da beıimdelgen. Olarǵa uıymdarda aqparattyq qaýipsizdik júıesin qurý boıynsha arnaıy ádistemelik usynymdar ázirlengen.
«Memlekettik qyzmetshilerdiń sıfrlyq saýattylyǵy — bul tek qaýipsizdik negizderin bilý ǵana emes, sonymen qatar memlekettik IT-ınfraqurylymnyń senimdiliginiń irgetasy. Biz sıfrlyq ortada sanaly áreket etý mádenıetin qalyptastyrýǵa umtylamyz», — dedi aqparattyq qaýipsizdik salasyndaǵy ýákiletti organnyń ókili.
Oqý myńdaǵan qyzmetkerlerdi qamtıdy, olardyń qatarynda asa mańyzdy memlekettik aqparattyq júıelermen jáne azamattardyń jeke derekterimen jumys isteıtin mamandar da bar. Bul bastama kıberqaýipterge qarsy turaqty aldyn alý jumystary aıasynda iske asyrylýda. Onyń aıasynda onlaın-kýrstarmen qatar oflaın-semınarlar, trenıngter jáne aqparattyq-túsindirý sharalary ótedi.
Halyqaralyq zertteýler derekterine sáıkes, kıberkeńistiktegi oqıǵalardyń 80%-ǵa jýyǵy adamı qatelikterden týyndaıtyny anyqtalǵan. Paıdalanýshylardyń habardar bolý deńgeıin arttyrý — sıfrlyq júıelerdi qorǵaýdyń eń tıimdi tásilderiniń biri.
Citizensec.kz platformasy qazaqstandyq jáne halyqaralyq sarapshylardyń qatysýymen ázirlengen jáne aqparattyq qaýipsizdik mamandaryn daıarlaý boıynsha zamanaýı ádistemelerge saı keledi.
Kıbersaýattylyqty arttyrý — qaýipsiz sıfrlyq ortany qalyptastyrýǵa baǵyttalǵan uzaq merzimdi strategııanyń bir bóligi. Paıdalanýshylardyń sanaly áreket deńgeıi neǵurlym joǵary bolsa, memlekettik sıfrlyq servıster soǵurlym senimdi jáne turaqty jumys isteıdi. Al bul servısterge kún saıyn mıllıondaǵan qazaqstandyq táýeldi ekenin atap ótken jón.