Elordada Power Central Asia + China atty alǵashqy óńirlik energetıkalyq forým óz jumysyn bastady. Aýqymdy is-sharany elimizdiń Energetıka mınıstrligi men «ınfraqurylym jáne ınnovasııalyq damýǵa járdemdesý qaýymdastyǵy» birlesip uıymdastyryp otyr. Forým «Ortalyq Azııa – Qytaı» sammıti aıasynda ótkizilip, energetıka, ónerkásip jáne joǵary tehnologııalar salasyndaǵy ekijaqty strategııalyq bastamalarǵa jol ashýdy kózdeıdi, dep jazady Egemen.kz.
Forýmnyń basty mindeti – Qazaqstan men Qytaı arasyndaǵy saıası ózara senimge negizdelgen kelisimderdi praktıkalyq deńgeıde júzege asyrý. Bul elimizdiń energetıkalyq qaýipsizdigin kúsheıtýge, otandyq shıkizatty tereń óńdeýge jáne tıimdi energııa ekonomıkasyna kóshýge múmkindik beredi. Sonymen qatar, mańyzdy ınvestısııalyq jobalar men strategııalyq qujattarǵa qol qoıý josparlanǵan.
Forýmnyń ashylýynda sóz sóılegen Energetıka mınıstri Erlan Aqkenjenov Qazaqstan men Qytaı arasyndaǵy energetıkalyq áriptestikti «altyn otyz jyldyqqa» bet alǵan kezeńdegi jańa serpin dep baǵalady.
«Negizgi bastamalar qatarynda – Shymkent munaı óńdeý zaýytyn jańǵyrtý, Aqtóbe oblysynda karbamıd óndiretin zaýyt salý, sondaı-aq jańartylatyn energııa kózderi salasynda aýqymdy jobalardy iske asyrý bar. Bul – ártaraptandyrylǵan, tehnologııalyq ekonomıka qurýǵa baǵyttalǵan qadamdar», dedi E. Aqkenjenov.
Plenarlyq sessııada taraptar birneshe iri jobany tanystyryp, birqatar kelisimderge qol qoıdy. Atap aıtqanda:
Shymkent MО́Z-in jańǵyrtý: QR Energetıka mınıstrligi, «QazMunaıGaz» AQ jáne CNPC arasynda zaýyttyń qýattylyǵyn jylyna 12 mln tonnaǵa deıin arttyrýǵa baǵyttalǵan negizdemelik kelisim jasaldy.
Karbamıd zaýyty: Aqtóbe oblysynda júzege asyrylatyn joba boıynsha Qazaqstannyń Energetıka mınıstrligi, «QazMunaıGaz» UK» AQ, CNPC jáne oblys ákimdigi arasynda kelisimge qol qoıyldy.
Gaz salasyndaǵy yntymaqtastyq: «Soltústik-1» jobasy boıynsha Energetıka mınıstrligi, «QazaqGaz» UK» AQ jáne CNPC arasynda úshjaqty málimdeme qabyldandy.
Jańartylatyn energııa kózderi: «Saýran» kún elektr stansııasyn salý, gıdroakkýmýlıasııalyq stansııalar men sýtegi energetıkasy baǵytynda Qytaı kompanııalarymen memorandýmdar jasalyp jatyr.
Forým aıasynda PowerChina, Huawei jáne Longi sııaqty iri qytaılyq korporasııalar Qazaqstanda óndiristi jergiliktendirý jáne tehnologııalyq sheshimderdi engizý nıetin bildirdi. Bul baǵytta zertteý ortalyqtary men joǵary tehnologııalyq óndiristerdi damytý jóninde naqty ýaǵdalastyqtar bar.
Sonymen forým sońynda energetıka salasyndaǵy jetekshi kompanııalar men ınvestorlar ózara kelisimderge resmı túrde qol qoıyp, jańa bastamalarǵa negiz qalady. Shymkent MО́Z-in jańǵyrtý, gaz-hımııa jobalaryn iske asyrý jáne balamaly energetıka tehnologııalaryn engizý – Qazaqstan men Qytaı arasyndaǵy seriktestiktiń kelesi kezeńin aıqyndaıtyn mańyzdy bastamalar sanalady.
Power Central Asia + China forýmy — óńirlik energetıkalyq turaqtylyqty qamtamasyz etýge jáne uzaq merzimdi ekonomıkalyq ósimdi qoldaýǵa baǵyttalǵan strategııalyq alań retinde tanylyp otyr.