Qazaqstan Prezıdenti Qasym-Jomart Toqaev Qytaıǵa 1 500 aqbóken (kıik) berý týraly sheshim qabyldady. Bul bastama kórshi eldegi sırek kezdesetin janýar popýlıasııasyn qalpyna keltirýdi maqsat etedi, dep habarlaıdy Egemen.kz.
Qazaqstannan jiberiletin kıikter Qytaıdyń batys bóliginde jersindirilip, sol aımaqtaǵy ekojúıeniń baıyrǵy múshesin qaıta tiriltýge úles qosady. Qytaı Halyq Respýblıkasynyń Tóraǵasy Sı Szınpın atalǵan bastama úshin Qazaqstan tarabyna rızashylyǵyn bildirip, aqbókenderdiń sanyn arttyrýǵa baǵyttalǵan keshendi sharalar qolǵa alynatynyn málimdedi.
Aıta keteıik, sońǵy jyldary Qazaqstanda aqbóken popýlıasııasy aıtarlyqtaı kóbeıgen. Qabyldanǵan ekologııalyq sharalar men tabıǵatty qorǵaý saıasatynyń nátıjesinde kıikter sany qalpyna kelip, halyqaralyq deńgeıde tabıǵatty saqtaý bastamalaryna serpin berip otyr.